Tamil Nadu: CBI-ten minister leh police official-te in dap

Central Bureau of Investigation (CBI) chuan nimin khan Gutkha scam kaihhnawihah Tamil Nadu-a hmun 40 vel zet an dap a, an dap zingah hian Health Minister C Vijayabaskar, DGP TK Rajendran leh DGP hlui S George-te chenna in pawh a tel.

Chennai-a Gutkha siamtu company chu sorkar chhiah a pek tur cheng vaibelchhe 250 awltirah puh a ni. Kum 2016 July thla khan hemi chungchang avang hian company godown, office leh chenna in ṭhenkhatte dap a lo ni tawh bawk. Hemi ṭuma an dapnaa diary an hmuhah sorkarin khawpui chhunga hralhchhuah a khapna siamṭhat tir a nih theih nan mi eng emaw zat hnenah thamna an pe ti hmuhchhuah a ni. Diary-a hming tarlan zingah hian Health Minister C Vijayabaskar pawh hi a tel a ni.

Document-a a landanin, Vijayabaskar leh senior official-te hnenah thamna cheng vaibelchhe 40 pek a ni. Hetianga dik lo taka thil tihnaah hian senior police officer leh bereaucrat te inhnamhnawiha puh an ni a, an zingah hian Rajendran, Goerge bakah Health and Food Safety department-a official te leh local councillor-te pawh an tel nia tarlan a ni.

Gutkha scam chhui hna hi kumin April thla khan CBI kutah hian hlan a ni a, May thla khan investigating agency hian central exise department, Tamil Nadu sorkar leh food safety department-a official ṭhenkhat lakah thubuai a ziaklut.