Gujarat sorkarin nawrh titawp turin Patel a nawr

Gujarat sorkar chu loneitute loan ba ngaidam tur leh, Patidar hnam tana OBC category-a reservation siamsak phuta nawrh huaihawt, Hardik Patel chu tiamchin awm loa a nawrh tihtawp tawh turin a ngen.

Hardik Patel hian August 25 aṭang khan tiam chin awm loin chaw ngheia nawrh a ṭan a, ni 11 chhungin kg 20 dawn a hloh tawh a ni.

Thawhlehni zan khan Gujarat-a BJP kaihhruai sorkar chuan Gandhinagar-ah Patidar hruaitu pawimawhte chu meeting a neihpui. Meeting zawh hnua chanchinthar lakhawmtute a kawmnaah, Energy Minister Sarubh Patel chuan Hardik Patel-a nawrh huaihawt mek tihtawp tir chu sorkarin a tum dawn tih a sawi.

Revenue Minister Kaushik Patel leh Minister of State for Home Pradeepsingh Jadeja pawhin Patidar hruaitute hi kawmin, sorkar chuan Hardik Patel-a chu a ngaihtuah hle tih a sawi a, Partidar hruaitute pawh a chawnghei titawp tura nawr turin a ngen.

Kum 25 mi, Hardik Patel-a nawrh huaihawt hian ngaihven a hlawh hle a, Union Minister hlui Yashwant Sinah leh BJP MP Shatrughan Sinah-te pawhin a chenna inah hmuin an thlawp thu an hrilh. Yaswant Sinha chuan Patel-an loneitute chungchanga a thil phut chu sorkar laipuiah pawh thlen ngei a tum tih a sawi a, Gujarat state chauh ni lo ramchhung hmun hrang hrangah loneitute tan hian an bei dawn tih a sawi a ni.