Kerala-ah rat fever damdawi indaih lo

Kerala state-a tuilian nasa tak thleng chu kam tawh mah se, tui aṭanga hri inkaichhawn theih leptospirosis, 'rat fever' tia hriat lar leng zui a, mi 12 in he hrileng vang hian nunna an chan tawh. Hetih lai hian state chhungah rat fever damdawi hi an indaih lo hle nia sawi a ni.

Health Ministry thupuangtu chuan August thla laihawl vel aṭang khan rat fever vei nia hriat hi mi 800 vel an tlingchho tawh niin a sawi. He natna hri hi rat fever veitu ransa zun aṭanga kaichhawn theih a ni a, a veite chuan khawsik sang tak an neih bakah tha na (muscle pain) an nei tel bawk.

Ministry thupuangtu chuan rat fever vanga thi chhinchhiah hi mi 12 an tling tawh a, hetihlai hian he natna vanga thi nia rinhlelh, medical report la nghah mek nen chuan 41 an tling niin a sawi.

Rat fever len hluarna ber, Kozhikode district-ah chuan damdawi an indaih lo nasa hle. Health officer RS Gopakumar chuan thla hnih chhung atan rat fever damdawi hi tablet maktaduai thum vel mamawh a nih laiin, tunah hian tablet nuai nga vel chauh an kawl tih a sawi. "Supply tu chu kan nei a, mahse kan chhekkhawl hi a kal chak em a ni" tiin, he damdawi hi rat fever laka lo inven nan thla khat chhung kar tin ei a ngai a ni, a ti.

Damdawi indaih lohna vang hian state sorkar chuan Maharashtra, Tamil Nadu leh Karnataka state-te puihna an dil mek niin Gopakumar chuan a sawi bawk.