Loneituten Ramlila Maidan-ah rally huaihawt

New Delhi-a Ramila Madila aṭanga Parliament thlengin nimin khan loneitute leh labourer-ten hlawh ṭha zawk pek, thlai thar man ṭha zawk leh an leiba ngaihdam phutin kawng an zawh.

Kawngzawh hi Left-oriented organisation–All India Agricultural Workers` Union (AIAWU), Centre of Indian Trade Unions (CITU) leh All India Kisan Sabha (AIKS) ten an huaihawt a ni.

AIKS general secretary Hannan Mollah chuan sorkar policy hrang hrangte chuan loneitu, farmworker leh labourer-te dinhmun a tichhe zawk niin a sawi a, a thawkchhuaktu ber an ni chungin an thawhrah man chu an tel ṭha lo hle tih a sawi.

Mollah chuan pawl hrang hrangte hian sorkar laka an lungawi lohna chu a rualin an lantir tih a sawi a, central-a BJP kaihhruai sorkar policy siamte chu sumdawng liante chauhin an chhawr theih, mipui nawlpuiten hlawkpuina an neih ve theih loh a ni, a ti. Sorkar policy chu thlak danglam an duh thu a sawi a ni.

Nimina nawrh huaihawtte hian sorkar laka an thil phut 15-te an tarlang nghal bawk. Thil man sang zel khuahkhirh te, Public Districbution System zau zawka kalpui te, hna thar tam zawk siam te, minimum wage chu thla khata Rs 18,000 aia tlem loa siam te, labour law siamṭhat tumna an duh lohna te a tel.

CITU general secretary Tapan Sen chuan an thil phut hrang hrangte chu sorkarin a ngaihsak loh chuan na zawka nawr an tum tih a sawi.

Nimina nawrh huaihawt hi left organisation-te bakah trade union, employee union leh teacher federation te pawhin an thlawp.