Supreme Court-in mahni anpui kawp khapna a hnawl

Supreme Court chuan nimin khan Indian Penal Code-a Section 377, mahni anpui kawp khapna chu a hnawl ta. Mahni duhthu ngeia mahni anpui kawpte chu Section 377 hian an hrem theih loh, a ti.

Supreme Court hian kum 2013 khan mahni anpui kawp khapna thlawp lamin thutlukna a lo siam tawh a, mahse nimin khan a thutlukna lo siam tawh hi thlakin sawizui hlawh tak Section 377 hi a hnawl ta a ni.

Section 377 tihbo phut hian mahni anpui kawp thlawptute bakah NGO te chuan court-ah petition an thehlut a ni. Hetihlai hian Kristian pawl hrang hrang, Apostolic Alliance of Churches leh Utkal Christian Association leh a dangte bakah,NGO leh mimal eng emaw zatin petition hi an dodal thung.

Nimina khan Supreme Court judge panga-te chuan Section 377 chungchanga petition thehlutte chu ngaihtuahin, he khapna dan siam hi thil awm lo leh awmze mumal nei lo tia sawiin hnawl a nih tak thu Chief Jutsice of India Dipak Misra chuan a sawi.

Court thutlukna hi puangin, CJI Misra chuan inthleibikna awm ṭhin chu tihtawp a ni a, khua leh tuite chu ang khat veka thuam chak an ni ta a ni, a ti. Mihring nihna behchhana inenhranna leh inthliarna awm ṭhin chu fundamental rights palzutna a ni, a ti. LBGT (Lesbian, Bisexual, Gay leh Transgender) te chuan midang ang bawkin fundamental rights an nei a ni, tiin Court chuan a tarlang.

IPC Section 377 :
Indian Penal Code-a Section 377 hian mahni anpui kawp chu thilsual, pawikhawihna angah a dah a ni. He dan bawhchhiate chu damchhung lung-in tantir thlenga hrem theih an ni. He dan hi kum 158 kalta, kum 1862-a British rorelna hnuaia awm laia siam kha a ni. He section tibo tur hian kum 2001 khan NGO Naaz Foundation chuan Delhi High Court-ah petition alo thehlut tawh a, kum 2009 khan HC chuan puitling, mahni duh thu ngeia mahni anpui kawpte dan kalha puanna chu hnawl a ni. Mahse kum 2013 khan Supreme Court chuan high court thutlukna siam hi hnawlsakin, dan ṭhiah chungchang chu parliament tihtur a ni a ti a, mahni anpui kawp chu dan kalh tiin a puang leh a ni.

IPC Section 377 tihbo duhtute chuan he section hian Indian Constituon-a article ṭhenkhat a kalh thu an sawi.

1) Article 14 chuan mitin chu dan hmaah ang khat vekah a puang.

2) Article 15 chuan mi tupawh a sakhua, nihna, hnam leh thildang behchhana enhran leh thliarhan a ni tur a ni lo tiin a sawi.

3) Article 21 chuan mitin chu an nun leh mimal thilah zalenna a pe.