Telangana CM-in state assembly ṭhiat

Assembly inthlan buatsaih hma duh Telangana Chief Minister K Chandarsekhar Rao chuan assembly inthlan neih a nih theih nan nimin khan state assembly a ṭhiat.

State cabinet chuan nimin zing khan meeting neiin, inthlan neih hma rawtna chu an pawm a ni. Telangana assembly term kal mek hi nakkum May thlaah a tawp dawn a, mahse hemi hun nghak loa inthlan hi buatsaih hma an duh zawk a ni.

CM KCR hian cabinet meeting zawh hnuah Governor ESL Narasimhan hmuin, assembly ṭhiah an duh thu hi a hrilh a ni.

Hetih lai hian Congress party chuan court leh Election Commission-ah an state chhunga voter revised list tihchhuah a nih hma chuan inthlan hi buatsaih rih loh tura an duh thu an thlen dawn. Congress hruaitu M Shashidhar Reddy chuan kumin December thla-a state ṭhenkhat ten assembly inthlan an neih ruala inthlan chu buatsaih ve lo tura an ngen tur thu a sawi. An ngenna hi ngaihtuah a nih loh chuan, court lamah kal an tum tih a sawi bawk.

Telangana-a rorellai, Telangana Rashtra Samiti (TRS) chuan nakkuma Lok Sabha inthlanpui neih ruala state assembly inthlan neih aiin, kumin December thlaa Rajasthan, Madhya Pradesh leh Chhattisgarh-a assembly inthlan neih ruala inthlan buatsaih ve nghal hi an duh zawk thung a ni.