Beating Retreat ceremony-a rimawi tum turah Kristian hymn "Abide with me" paih a ni

January 29-a Beating Retreat ceremony neiha rimawi an tum zinga an telh ziah ṭhin, Kristian hymn "Abide with me' (Ka Lalpa duhtak min awmpui ang che) tih chu BJP sorkar chuan kumina rimawi tum tur list aṭangin a paih.

Media mite hnena Beating Retreat ceremony programme pek chhuahah, kum 1950 aṭanga band-in an tum telh ziah, 'Abide with me' tih hi telh a ni ve ta lo a ni. He hla hi kum 1847-a Scotting Anglican Henry Francis Lyte-a'n a thih hma lawka a phuah a ni. He hymn hi Mahatma Gandhi hymn duh ber zinga mi a ni bawk.

Kumtinin Republica Day lawmna tihtawpna pualin January 28 tlaiah Delhi-a Vijay Chowk-ah Beating Retreat ceremony hi neih a ni ṭhin. Raisina Hill-a ni a tlak laiin band-ten rimawi hrang hrang tumin, band-ah hian Army, Navy, Air Force bakah Central Armed Police Forcse, pipes and drums band-te telin, a huhoin an tum ṭhin.

Kuminah hian rimawi tum tur hi band paruk aṭangin bugler 44, trumpeter 16 leh drummer 75 an awm dawn a, hla 25 tumin a kharna atan 'Sare Jahan Se Achcha' an tum ang. Kuminah hian kum danga an la telh ngai loh, drone show leh laser show te neih tel a ni dawn bawk.

Sorkar lam chuan kumina hun hmanah hian Indian tune tam thei ang ber tum a duh avangin 'Abide with me' hi paih a ni tih a sawi. Kum 2020-a Beating Retreat ceremony-ah khan paih a lo tum tawh a, mahse Narendra Modi kaihhruai sorkar chuan sawisel a hlawh nasat phah avangin tum tur zingah a dah let leh a ni.