Goa Congress candidate-ten party-a rinawmna thutiam la

Goa-a Congress party chuan party MLA-te party danga an uire ṭhin tihtawp turin ruahmanna a siam. February-a assembly inthlan neih tura an party candidate-te chu Congress party-a rinawmna tur thutiam a laktir vek.

BJP sorkarin term chelh mek chhung hian Congress MLA 17 zinga 15 te chu party dangah an insawn a, House-ah hian Congress chuan MLA pahnih an neih laiin BJP chuan MLA 27 lai an nei tawh thung a ni.

Panaji-a Mahalaxmi temple leh Konkani-a Bambolim Cross puithiamte chuan candidate-te hi inthlana hnehna an chan aṭangin Congress-ah kum nga tal awm turin thutiamte an lak tir a ni.

MLA candidate 34-ten thutiam an laknaah senior leader P Chidambaram, All India Congress Committee Goa desk in-charge Dinesh Gundu Rao leh Goa Pradesh Congress Committee hotu Girish Chodankar-ten an telpui a ni.

"Mipuiten rinna nghet zawk an neih theihna turin, Pathian hmaah candidate thutiam hi neih a ni" tiin Chodankar chuan a sawi. "Mipuite rilrua rin ngam tawk lohna awm ṭhinte chu nuaibo kan tum. Congress hi kan tumah kan chiang a, tih takzeta kalpui kan duh a ni. Political party dangte chuan kan MLA min laksak a, kan MLA-te pawisa hmanga thlem a, min leisak tumte chungah na zawka hma kan lak a ngai a ni," tiin Congress legislature party leader Digambar Kamat chuan a sawi.

Election hnuhnung ber aṭang khan, Congress hian legislator an chan hnem ber a. Kum 2017-a inthlanah khan seat la hnem berin, seat 17 an la a, tunah hian House-ah MLA pahnih chiah an nei tawh a ni. Kum 2019 khan, Congress legislator 10-te chuan rorellai BJP an zawmsan bawk a ni. Hetih lai hian, Congress hi state chhunga party danga inleh titawp tura hmalatu awmchhun erawh an ni lo. Goa Assembly election chuh tuma inbuatsaih mek Aam Aadmi Party (AAP) chuan an candidate -te an thlang tling a nih chuan party dang an zawm lohna tur dan, legal affidavit chu an candidate te an sign tir a ni.

Association of Democratic Reforms report hnuhnung berah MLA-ten party an thlak chungchangah Goa hian record duhawm lo tak a siam. Kum nga chhungin member 40 awmna state assembly-a member 60%, MLA 24 zetin an party an thlak kual hman a ni.

Goa assembly inthlan hi February 14-ah neih a ni dawn, March 10-ah vote tlate chhiarin result puan nghal a ni ang.