Fuel man pung vangin rampum huap nawrh huaihawt tum

Ramchhungah fuel man a sang chho zel a, thlakhat chhungin diesel man hi litre khat Rs 4 leh petrol man litre khat Rs 3 in a sang hman a, nimin khan fuel man hi pawisa 50 in a san belh leh bawk. Hei vang hian eptu party, Congress leh Left party-te chuan lungawi lohna lantirin rampum huap nawrh huaihawt an tum.

Congress party chuan fuel man sang zel duh lohna lantirin September 10-ah Bharat bandh huaihawt a tum a, Left party-te pawhin hemi ni vek hian bandh huaihawt an tum ve bawk.

Congress party chuan Prime Minister Narendra Modi-a kaihhruai NDA sorkar chu na takin a sawisel a, ramchhunga thil man sang zel chuan record a siam mek laiin, union finance minister chuan mipuite chu hlauthawng lo turin ala hrilh a ni, an ti. "Congress party chuan eptu pawl mawhphurhna chu a ko-ah lain, mipuite aiawhin aw a chhuah zel dawn a ni. Sorkar laipui chu mipuite laka a mawhphurhna kenkawh kawngah a hlawhchham a ni", tiin Congress hruaitu leh union minister hlui Anand Sharma chuan a sawi.

Crude oil man tihsan vang leh, India pawisa hlutna tlahniam zel avangin August thla aṭang kahn fuel man hi a la san belh zel a ni. Nimin khan Mumbai-ah chuan petrol hi litre khat Rs 87.39 a tawng chho tawh a, Chennai-ah Rs 83.13 leh Kolkata-ah Rs 82.88 a ni bawk.