BJP MLA lei tansak ngamtu hnenah Rs nuai 5 pek tiam
Maharashtra minister hlui leh Congress hruaitu, Subodh Saoji chuan BJP MLA Ram Kadam-an hmeichhe chungchang mawi lo taka a sawi avangin a lei (tongue) tansaktu hnenah lawmman, cheng nuai nga pek a tiam.
Maharashtra-a rorellai, BJP MLA Ram Kadam hian Thawhlehni khan mipa-in nupui atana a sawm hmeichhia chuan a lo hnial a nih pawhin chu hmeichhia chu a kidnap pui tur thu leh, hmeichhia chu a tlanbopui theih nan a mipa chu puih a inhuam thu a sawi. A thusawi hian sawizui leh sawisel a hlawh nasa hle a, an thawhpui Shiv Sena leh party dangte pawhin BJP MLA thusawi hi an dem thu an sawichhuak a ni.
Kadam-a thusawi lanna video clip hi a darh nasa hle. Kadam chuan mipa tam takin nupui atana hmeichhia an sawmten an lo hnar avanga ṭanpui tura an ngen thu sawiin, heng mipate hi ṭanpui a tiam a, an nu leh pate nena amah chu hmu turin a sawm a ni. Mipa nu leh paten an remtihpui a nih chuan, nupui atana an hmeichhe duhte chu kidnap sakin, an nupui atan an pe ang tiin Mumbai-a Ghatkopar assembly constituency-a inkhawm buatsaihah a sawi. Kadam hian mipui kalkhawmte chu a mobile number pawh a hrilh nghal a ni.
A thusawi chungchang hi sawiselna tam tak a awm hnuah Kadam hi a insawifiah zui a, a thusawi chu an ngai kawi lui niin a sawi. "Journalist pawh tam tak an awm a, thil dik lo sawi ila an sawichhuak ngei ang. Mahse ka thusawi pum an ngaihthlak avangin thil dik lo a awm lo tih an hria a ni. Eptu lam hian ka thusawi lakkawiin video tawite hi an thehdarh a ni" a ti. Ṭhalaite chu an nu leh pate remtihna an hmuh hunah nupui pasal nei chauh turin a ti niin a sawi thung.
Hetih la hian Shiv Sena chuan BJP MLA hi a thusawi avang hian thupha chawi turin a phut a, Chief Minister Devendra Fadnavis hnenah pawh a MLA chungah hian hmeichhiate himna tiderthawng lam hawia thu a sawi vangin action la ngei turin an phut bawk.
Assembly-a eptu hruaitu Radhakrishna Vikhe-Patel chuan Kadam-a thusawi duhdan chu thil pawi leh demawm tak a ni tih sawiin, state sorkar chuan a man nghal tur a ni, a ti.
State NCP hotu Jayant Patil pawhin Maharashtra-ah hmeichhia kidnap an awm palh a nih chuan hetiang ti tura fuihtu, MLA Kadam lakah hian thubuai ziahluh nghal tur a ni, a ti bawk.