Non-BJP CM-ten PM Modi hnenah lehkha thawn IAS cadre rules siamṭhat tumna sut turin ngen

Sorkar laipuiin IAS (Cadre) Rules, 1954 siamṭhat a tum chu duh loin, non-BJP chief minister-te chuan prime minister Narendra Modi hnenah lehkha an thawn a, an thutlukna siam chu sut leh turin an ngen.

IAS(Cadre) Rules, 1954 siamṭhat tum danah hian, state sorkarin reservation a neih ve dahṭhain IAS officer-te chu central deputation-in dah an ni thei dawn a ni.

Mahse hei hian state inrelbawlna thlengin a nghawng thei dawn a ni tiin, non-BJP chief minister-te chuan an sawi. PM hnena lehkha thawntute hi West Bengal, Chhattisgarh, Rajasthan, Jharkhand, Tamil Nadu leh Kerala CM-te an ni. Dan siamṭhat tumna hi sorkar laipuiin a thuneihna belhchhah a tumna a ni a, hei hian All India Service officer-te rilru leh zalenna thlengin a tichhe dawn tih an sawi.

West Bengal CM Mamata Banerjee chuan hemi chungchangah hian PM hi lehkha pahnih a thawn a, rules siamṭhat tum dan chu central sorkar inlulin theihna tur, dan sakei a ni dawn tih a sawi. Jharkhand CM Heman Soren pawhin dan tihdanglam tum dan hi thawhdunna ṭha siam tum aiin, pakhat lam chauh dah pawimawh chhoh tumna niin a sawi bawk.

Hetih lai hian sorkar chuan IAS officer-te chu state-ah an awm reng thei lo a, hei hi an service leh officer tan pawh a ṭha ber lo tih a sawi. State sorkar hnuaia an thawh hnua central sorkar hnuaia an kir leh chuan, an mimal tan pawh hmasawnna a nih thu a sawi.