India-ah Covid-19 kai hmuh chhuah tam ber ni thleng leh

Hripui lengin ziaawm lam pan thei tak tak lo mah se ni hnih thum chhung vel hri kai hmuh chhuah thar zat a tlakhniam hnuah nimin khan coronavirus kai hmuh chhuah tam ber ni a thleng leh a, hmuh chhuah thar mi 12,881 lai an awm.

India ramah hripui kai mi 3,66,946 an awm tawh a, enkawl dam 1,94,325 awm tawhin hri kai mek 1,60,384 an awm a; thihpui 12,237 an awm tawh bawk.

Ministry of Health and Family Welfare-in nimina report a tih­chhuahah darkar 24 chhungin enkawl dam 7,390 an awm a, thihpui 334 an awm belh leh bawk. Enkawl dam tawh rate hi 52.95% a tling tawh a, thihpui rate chu 3.33% a ni thung.

Indian Council of Medical Research (ICMR) chuan darkar 24 chhungin Covid-19 sample 1,65,412 an test a, nitinin an test theih zat hi a pung zel a ni. Nimina report an tihchhuah thleng khan sample 62,49,668 an enfiah tawh a, nikhat chhunga test tawh punna hi a tam hle. 

Covid-19 testing facility-ah pawh India chuan hma sawn zelin laboratory pawmpui 953 a nei tawhin darkar 24 chhungin laboratory 29 a approve a ni. Heng zinga 699 hi sorkar laboratory a nih laiin 254 chu private laboratory a ni thung.

Health and Family Welfare Minister, Dr. Harsh Vardhan chuan nimin khan Covid-19 test theihna mobile laboratory hmasa ber a tlangzarh.

Mobile lab. thar hi Infectious Disease Diag Lab (I-LAB) niin Department of Biotechnology hnuaia buatsaih a ni. he Mobile lab thar hi hmun kalpawh harsa deuha hman tur a ni a, ni khatah  RT-PCR test 25 a tih theih bakah ELISA test 300 a ti thei dawn a ni.