Fuel man sang duh loin Bharat Bandh huaihawt dawn

Eptu party-te chuan petrol leh diesel man san belh zel duh lohna leh lungawi lohna lantirin vawiin hian ram pum huapin nawrh a huaihawt dawn. Bharat bandh huaihawttu turte hi Congress, Janata Dal (Secular) leh Left party-te an ni.

Vawiin zing dar 9 aṭanga tlai dar 3 thlengin nawrh hi huaihawt a ni dawn. Petrol leh diesel man sang zel duh lohna lantirna leh, ramchhunga thil man sang zel duh lohna lantirna bakah, loneitute loan ba ngaihdam sak tur leh an thlai thar mante ṭha zawka siamsak turin sorkar an phut bawk.

All India Congress Committee (AICC) chuan thil man sang zel, India ram pawisa hlutna tlahniam leh mipuite kaihhnawih thil hrang hranga harsatna thleng mek duh lohna lantirin nawrh hi an huaihawt dawn tih an sawi. Karnataka unit president Dinesh Gundu Rao chuan rampuma nawrh huaihawt chu mipuiten Prime Minister Narendra Modi-a policy kalpui avanga harsatna an tawh leh an thinurna auchhuahna tur a ni, a ti.

Congress chuan mipui nawlpuiten harsatna zualpui an pumpelh theih nan nawrh huaihawt hi zing dar 9 leh tlai dar 3 inkarah neih a ni dawn tih an sawi. Mipuite harsatna thlen leh tihbuai chu an duh lo tih an sawi a, mahse hemi rual hian PM Modi-a kaihhruai sorkar hnuaiah India ram chuan dinhmun harsa tak a tawn chhoh mek avangin lungawi lohna lantir hi a ngai niin an sawi.

Bharah Bandh huaihawt hi eptu party dang, Dravida Munnetra Kazhagam (DMK), Rashtriya Janata Dal (RJD), Jana Sena Party, Left front CPI, CPM, CPI-ML, SUCI leh Forward block leh Nationalist Congress Party (NCP) chuan an thlawp a, All India Kisan Sabha (AIKS) pawhin a thlawp dawn tih a puang ve leh bawk. Indian National Lok Dal (INLD) chuan a hranin Inrinni khan nawrh a lo huaihawt tawh bawk a ni.

Odisha : Odisha sorkar chuan bandh huaihawt dawn vang hian vawiinah school zawng zawngte chu khar vek turin a ti. District collector-te chu nawrh huaihawt chhunga buaina chhuak palh tur veng tura dan leh thupek kengkawh ṭha turin a hriattir a, service pawimawhte a khawih buai lohna turin hma la turin a ti a ni.

Karnataka : Congress nena ṭangrual sorkar siamtu, JD(S) chuan bandh hi a thlawp dawn tih a sawi. pawl hrang hrang Karnataka Rakshana Vedike, KSRTC, BMTC, Ola and Uber Drivers and Owners Association, Private Taxi Owners Association, Tours and Travels Taxi Association, Auto Drivers' Association te pawhin bandh hi an thlawp tur thu an sawi.

West Bengal : Rorellai Trinamool Congress chuan eptute bandh huaihawtah hian tel dawn lo mah se a thlawp dawn tih a sawi. TMC bakah All India Forward Bloc (AIFB) chuan bandh huaihawt tur chung­changah biakrawn an nih ve loh avangin an tel ve dawn lo tih an sawi bawk.

Goa : Goa Congress unit chuan Ganesh festival neih a nih dawn vangin mipuite tana harsatna siam duh loin bandh hi an huaihawt dawn lo tih a sawi.

Madhya Pradesh : Congress unit chuan state pumah bandh hi huaihawt a ni dawn tih a sawi. Party hruaitu Digvijay Singh chuan party dangte pawh an bandh thlawp tur hian party hrang hrang te a ngen kual a ni.

Bihar : RJD chuan bandhi hi a thlawp tih a sawi. RJD hian PM Modi-a kaihhruai sorkar chu kawng hrang hrangah fuel man sang zel tur venna kawngah a hlawhchham nia sawiin, sorkar laipui paihthlak tum hian nakkum January thla hian 'jail bharo' huaihawt a tum.

Maharashtra : Eptu party chuan an bandh huaihawt hi thlawp turin BJP sorkar thlawptu, Shiv Sena an ngen. Uddav Thackeray-a kaihhruai Shiv Sena hian Inrinni khan BJP sorkarin mipui nawlpuite harsatna sukiang tura a lo intiam tawhna a tihhlawhtlin theih loh chungchanga BJP laka zawhna an siam poster-te an tarchhuak. Maharashtra Navnirman Sena (MNS) hotu Raj Thackeray chuan bandh hi thlawp turin party mi leh sate a ngen.

Tamil Nadu : Tamil Nadu-a eptu party hrang hrante chuan Bharat bandh hi an thlawp dawn. Bandh hi hlawhtling taka kalpui a nih theih nan Left party hruaitute chuan meeting pawh an lo nei tawh a ni.

Haryana : Inrinni khan Indian National Lok Dal (INLD) chuan bandh hi an lo huaihawt tawh a, dawr leh sumdawnna hmun hrang hrangte khar a ni.

Kerala : Congress party chuan bandh huaihawt tur hi thlawp turin ngen mah se, Muslim League chuan a thlawp dawn lo tih an sawi. State assembly-a eptu hruaitu, MK Muneer chuan Congress hruaitute hnenah an state chu tuilian vanga chhiatna nasa tak thleng vanga an buainate a la reh loh avangin, an state-ah chuan bandh hi huaihawt ve lo mai turin a ngen.

Telangana : District Congress Committee (DCC) chuan bandh hlawhtling tak neih a nih theih nan theitawp chhuah an tum tih an sawi. Jana Sena hotu Pawan Kalyan pawhin bandh hi an thlawp dawn tih a sawi. Fuel man sang zel hi a tuartu ber chu lower leh middle class te an ni, a ti.