India leh China la inbe rem thei lo

Ladakh chhak lama Galwan valley-a Thawhṭanni zana India leh China sipaite intihbuaina a thlen hnuah, Indian Army Major General-te leh Chinese military officer-te an inbia a,  mahse an la inbe rem thei lo. 

Nimin khan buaina chhuahna hmun, Galwan Valley-a Patrol Point 14-ah major general-level officer meeting hi neih a ni a, Thawhlehni leh Nilaini pawh khan inbiakna hi an lo nei tawh bawk.

Galwan Valley-a ram pahnih sipaite intihbuaina  thlengah hian India sipai 20 an thi a ni. China lam hian an sipai thi leh hliam chungchang engmah an puangzar ve lo a, mahse Indian Army chuan China  lamawh pawh thi leh hliam 40 vel an awm nia an hriat thu an sawi. 

Buaina chhuah tukah hian ram pahnih sipai hotute chuan remna kawng zawngin inbiakna nei nghal mah se, an la inbe rem thei lo a ni. 

Foreign minister S Jaishankar chuan buaina chhuakah hi China sipaiten an hmaa an lo ruahman sa nia puhin, Nilainia Chian foreign minister Wang Yi nena phone-a an inbiaknaah a sawi chhuak a ni. 

Hetih lai hian China foreign ministry thupuangtu, Hua Chinying chuan ramria buaina chhuak chungchangah India chu mawhphurtuah puhin, India sipaite chuan Line of Actual Control (LAC) pelin China sipai, People's Liberation Army (PLA) te beiah nimin khan a puh let ve thung. 

Ramria sipaite inkara buaina chhuak vang hian ram chhunga China thil siam duh lohna lantirna hrang hrang a thleng zui. Indian Railways chuan China firm hnena freight corridor project thawhna tura contract a pek chu nimin khan a titawp. 

Telecommunication department pawhin company hrang hrangte hnenah China company, Huawei, ZTE leh a dangte nena thawhhona an neihte ennawn turin a ngen bawk. Department hian 4G network upgrade-na turah China hmanruate hmang lo tura ngen a tum bawk a ni. 

Union minister Ramdas Athawale chuan India rama Chinese food siamtu, restaurant leh hotel zawng zawng pawh khar vek a duh thu sawi a, China thil siam chhuahte chu India-in a boycott vek tur a ni, a ti.