Doctor leh healthcare worker-te Hlawh pek loh chu dan bawhchhiatna a ni

Supreme Court chuan Nilaini khan doctor leh healthcare worker-te hlawh pek loh chu Disaster Management Act leh Indian Penal Code-a Section 188 hnuaiah dan bawhchhiatna a ni tih a sawi.

Justice Ashok Bhushan, S K Kaul leh M R Shah awmna bench chuan sorkar laipui hnenah state leh UT sorkarte hnenah an bial chhunga doctor leh healthcare worker-te chu hlawh leh quarantine-na hmun tur pe ṭha turin a ti a ni. 

 

Dr Arushi Jain chuan thla hlui khan Covid-19 dona kawnga a hma tawngtu doctor leh healthcare worker-ten hlawh an hmuh ṭhat loh avang leh an hlawh tihkhawtlaisak an nih ṭhin avangin SC-ah petition a thehlut a, he petition hi Nilaini khan SC chuan a ngaihtuah a, state leh UT te chu kar li chhunga hlawh leh quarantine chungchanga report thehlut turin sorkar laipui a hriattir ta a ni. 

SC hian June 12 khan Covid-19 dona kawnga a hma tawngtu doctor leh healthcare worker-te chu tih vuivai chi an nih loh thu a lo sawi tawh bawk. Nilainia court rorelah hian sorkar lam aṭangin Solicitor General Tushar Mehta  a tel a, Mehta chuan darkar 24 chhunga SC thuchhuah hi state leh UT te hnena hriattirna pek nghal tum a nih thu a sawi.