Delhi-ah door-step delivery (DSD) scheme kalpui ṭan

Delhi Chief Minister Arvind Kejriwal-a chuan a kaihhruai Aam Aadmi Party (AAP) sorkar programme siam thar, mipuiten an kawtkai aṭanga sorkar office an dawr theihna tur, door-step delivery (DSD) scheme chu Thawhṭanni khan a hawng a, he scheme service hi hman ṭan nghal a ni.

Door-step delivery (DSD) scheme hi khawpui chhunga miten sorkar office an dawrna turah mahni kawtkai aṭanga tih theih chinah office-a kal kher ngai loa an tihfel theihna tura ruahman a ni. He doorstep delivery service hmang duhte hian '1076' an phone ang a, heta ṭang hian thawktute chuan an inah an pan mai dawn a ni. He service hi zing dar 8 aṭanga zan dar 10 thleng hawn a ni dawn a, hetihlai phone number-ah erawh chuan englai pawhin a biak theih thung ang.

DSD scheme hawn ni, Thawhṭanni khan call tumtu 21,000 an awm thu sawiin, heng zinga call 2,728 chuan an be tlang thei a, operator-te'n call 1,286 chauh an chhan theih thu Delhi sorkar chuan a sawi. Biak tumtu leh connect theih lote chu operator-te hian a hnuah an be let dawn tih a sawi. Tlai dar 6 thleng khan DSD scheme hmangtute aṭang hian appointment 369 siam felin, document 7 an lakhawm hman tih a sawi bawk.

Scheme hawngtu, CM Kejriwal-a chuan, "Kan kawtkaiah pizza min rawn pe thei tih chauh kan hre ṭhin. Tunah chuan Delhi mipuite chuan an kawtkai ngei aṭangin phone call chauh hmangin sorkar an dawr thei tawh dawn a ni. Hei hi mipuite rawngbawlsaktu sorkar chu a ni", a ti.