RJD hotuin depression a nei: RIMS medical report

Ranchi, Bihar-a Rajendra Institute of Medical Sciences (RIMS) director RK Shrivastava chuan Rashtriya Janata Dal (RJD) hotu Lalu Prasad Yadav chuan depression a nei niin a sawi.

Bihar Chief Minister a nih laia sorkar laipui aṭanga ranchaw man sum tam tham tak tihchingpen thubuaiah Lalu Prasad hi thiam loh chantir a ni a, jail-ah khung a ni. Mahse hun eng emaw chen jail-a a tan hnu damdawi lama inenkawl a ngaih vangin bail-a chhuahtir a ni a, a bail hi pawhsei a dil a, mahse court-in a remtih loh vangin August 30 khan Ranchi-a CBI court-ah a inpe a ni.

Court-a a inpek hnuah Prasad hi RIMS-ah hian dah a ni a, a awmna ward chu a thianghlim loin thosi a tam a, ui bauh riten a tibuai fo nia a sawi avangin a ngen angin kar kalta Nilaini khan ward dangah sawn a ni.

RL Shrivastava chuan Prasad-a hriselna endiktu doctor-te'n an report ziahah depression a nei tih an ziak niin a sawi a, a hmaa a lo inenkawl tawhna AIIMS aṭanga an chhuahtirna report-ah pawh depression a neih thu hi ziahlan a ni bawk a ni, a ti. Pyschiatrist-in a enkawl zui dawn leh dawn loh chungchangah engmah sawi ala awm lo niin a tarlang bawk.