PDP in J&K local poll boycott dawn

Peoples Democratic Party (PDP) president leh Jammu and Kashmir Chief Minister hlui Mehbooba Mufti-i chuan an state-a urban local body leh panchayat election neih tur chu an party chuan a boycott dawn tih a sawi.

Srinagar-a party MLA leh senior leader-te nean meeting an neih hnuah Mufti-i chuan inthlan boycott an tum thu hi a sawi. Mufti-i chuan,"Panchayat inthlan tur leh Article 35A chungchang Supreme Court-a thlen a nih avangin state chhung mipuite pawh a tichiai a ni. Hetihlaia sorkarin inthlan lo buatsaih a tum hi a hun lo a, ennawn turin kan ngen a ni", a ti. Mahse state sorkar chuan local poll neih tur hi ruahman lawk anga kalpui a nih tur thu a sawi thung.

National Conference (NC) president Farooq Abdullah pawhin Jammu and Kashmir tana special status pekna, Article 35A chungchangah sorkar laipuiin court chhung leh court pawn lamah a dinna hmun dik tak a tihchian hma chuan inthlan neihnaah tel an tum tawh lo tih a lo sawi tawh bawk. Congress party pawhin nimin khan local poll neih tura an tel dawn leh dawn loh chungchang ngaihtuahin meeting an nei.

BJP hruiatu Priya Sethi chuan inthlan neih tur dodaltu party-te chu mipuite ngaihsak lo leh state hmasawnna tur ngaihthahah a puh. Chak loh an hlauh vang mai niin a sawi.