Budget session : LS leh RS-te ro in rel chhawk dawn

Parliament budget session, January 31 aṭanga neihṭan turah Parliament in hnih, Lok Sabha leh Rajya Sabha-te chuan ro an inrel chhawk dawn a, ni khatah darkar nga zel rorel inkhawm an nei ang.

Rajya Sabha rorel inkhawm hi chawhma lamah neih ṭhin niin, chawhnu Lok Sabha inkhawm neih a ni thung ang. Lok Sabha inkhawmah hian Lok Sabha leh Rajya Sabha chamber leh gallery-te chu member-te ṭhutna atan hman a ni dawn.

Lok Sabha hi February 1-ah Union budget pharh turin chawhma dar 11-ah inkhawm an ṭan dawn a, hemi bak session thawh khatna chhung, February 2-11 ah chuan tlai dar 4 aṭanga zan dar 9 thleng an ṭhukhawm thung ang. Rajya Sabha ṭhutkhawm hun tur hi tihfel la ni lo mah se, chawhma dar 10 aṭanga chawhnu dar 3 thleng an neih rin a ni.

Budget session ṭanni, January 31 hian joint sitting hmaah president Ram Nath Kovind chuan thu a sawi ang. Session thawh hnihna chu March 14-April 8 ah neih leh a ni ang.