Kum 3 chhungin hmeichhia vote nei 5.1%, mipa 3.6% in pung : CEC

Kum thum liamtaa Lok Sabha inthlan neih hnuah ramchhunga hmeichhia vote nei chu 5.1%-a pungin, mipa vote nei chu 3.6%-in a pung bawk.

Chief election commissioner Sushil Chandra chuan January 25-a kumtina hman ṭhin, National Voters Day puala thuchah a neihah hei hi sawiin, ramchhunga vote nei zat chu kum 2019 Lok Sabha inthlanpuiah khan vaibelchhe 91.2 niin, hei hi tunah chuan 4.3%-a pungin vote nei vaibelchhe vbc 95.1 an awm tawh tih a sawi.

Vote nei vaibelchhe 95.1 zinga vbc 49 chu mipa an ni a, hmeichhia vbc 46.1 an awm bawk. Senior citizen, kum 80 chunglam vaibelchhe 1.9 awmin,rualbanlo nuai 81.4 an awm bawk a, vote nei zinga nuai 19.2 chu service ami an ni.

Nimin thleng khan voter inziak lut thar, newly-registered voter vbc 1.4 awmin, kum 2019 Lok Sabha inthlan khan kum 18-19 inkar, a ṭum khatna atana vote thlak thei mi vbc 1.5 an awm a ni. CEC chuan UP, Uttarakhand, Punjab, Goa leh Manipur-a inthlanna neih turah hian vote nei thar mi nuai 25 dawn an awm tih a sawi bawk.

Commission hian hmeichhia vote nei thei kum bithliah tling tawhte chu a tam thei ang ber ziahluh tumin chak takin hma la mah se roll-a la inziak lut lo mi tam tak an la awm tih a sawi. State pangaa inthlanpui neih hun tur an puan hnu pawhin, EC chuan state ṭhenkhata hmeichhe voter tlemnaah tualchhunga hnathawk leh Asha worker kaltlangin vote nei thei chin chu inziak lut turin theihtawp an chhuah thu a sawi. Chandra chuan vote nei thar mi ṭhahnem tak an awm theih nan, kum khat chhunga ṭum khat inziah luhna hun an hawn ṭhin chu kum khatah vawi li hawn a nih tawh thu a sawi a ni.