Vawiinah Republic Day lawm dawn

India Republic Day chu vawiin hian ram pumah lawm a ni dawn a, mahse Covid-19 hri leng vanga khuahkhirhnate kalpui mek a nih avangin a lawmna pawh hi tihnep a ni ang.

A lawmna pui ber, Delhi-a Republic Day parade neihna tur Rajpath-ah pawh mi 24,000 chin kal phal a ni dawn. Kalkhawmte pawh Covid vaccine dose kima la vek tawh an ni tur tih a ni. Naupang kum 15 hnuai lam kal khap a ni bawk.

Doordarshan chuan Rajpath-a Republic Day lawmna hi ram mipuite'n kimchang taka an hmuh ve theihna tura live-a an pekchhuahna turah camera 59 an hmang dawn a, staff 160 chuang dah an ni bawk. Camera-a parade route tluanin, Rashtrapati Bhawan aṭanga National Stadium thlengin dah a ni. Rajpath-a camera 33 dahin, National War Memorial, India Gate leh National Stadium-ah 16, Rashtrapati Bhawan-ah 10 dah a ni.

Kumina Republic Day lawmnaah hian ram dang hruaitu khuallian an awm dawn lo a, nikum pawhin UK prime minister Boris Johnson chu khuallian tura sawm ni mah se, a dawn hnaihah an rama Covid hri leng thar leh avangin a rawn ṭhulh a ni.

Kum dangah parade hi zing dar 10-ah ṭan a ni ziah ṭhin a, kuminah erawh a ṭum khatna atan parade ṭan hun darkar chanvea titlaiin, zing dar 10:30-ah ṭan a ni ang.

Tableaux parade-ah state leh union territory 12 bakah, ministry leh department pakua an inlan dawn. Tableau entir tur state/UT-te chu Arunachal Pradesh, Haryana, Chhattisgarh, Goa, Gujarat, Karnataka, Meghalaya, Maharashtra, Punjab, Uttar Pradesh, Uttarakhand, leh Jammu and Kashmir-te an ni.

Republic Day hman dan
• Kum 1950 leh 1954 inkar khan Republic Day parade hi Irwin Stadium (tuna National Stadium), Kingsway, Red Fort leh Ramila ground-ah neih a ni.
• Kum 1955 aṭangin Republic Day parade hi Rajpath-ah neih ṭan a ni. Rajpath hi emperor George V pualin Kingsway tih a ni ṭhin a, India independence hnuah Rajpath tiin thlak a ni a, a hming awmzia erawh a in ang tho a ni.
• Kumtinin Republic Day parade-a khuallian turin ram dang hruaitu sawm a ni ṭhin. Kum 1950 khan Indonesia president Sukarno chu khuallian niin, Republic Day lawmna ramdang hruaitu khuallian hmasa ber a ni.
• Parade hi India President a thlen hnuah ṭan a ni ṭhin. President cavalier bodyguard-te chuan Hnam puanzar chu salute an pe hmasa a, hnam hla play-in 21-gun salute in a zui ṭhin.
• Parade naa tel sipaite hi enfiah vek an ni ṭhin a, anmahni bakah an silai kente pawh uluk taka enfiahin, live bullet a awm leh awm lohte endik ṭhin a ni.