State ṭhenkhatin zin veivakte tan kaihhruaina siam

India ram chhunga Covid-19 hri lengin ziaawm lam a la pan theih mai loh avangin state eng emaw zat chuan hri darh tur venna kawng khat atan an state-a lutte tan khuahkhirhna an siam.

Ministry of Home Affairs (MHA) chuan sorkar laipuiin hri laka invenna tura kaihhruaina a siam bakah, state/union territory-te chuan an dinhmun azirin khuahkhirhna siam belh hi a lo phalsak tawh a ni.

Karnataka : Karnataka sorkar chuan Maharashtra aṭanga lutte chu ni sarih chhung sorkarin inkhunghranna tur a siamah a awmtir bakah, in lamah ni 14 dang inkhung turin a ti. State dang aṭanga lutte chu ni 14 chhung in lamah inkhung turin a ti.

West Bengal : West Bengal sorkar chuan state dang aṭanga an state-a lutte Covid RT-PCR test ti vek turin a ti.

Goa : Goa sorkar chuan an state-a lut turte chu darkar 48 aia rei loa Covid-19 negative test report nei turin a ti. Covid test certificate nei lote chu state chhungah Rs 2,000 sengin Covid-19 test neih tir vek an nih tur thu a sawi.

Jammu and Kashmir : J&K sorkar chuan an state-a lut tur, symptom neilote chuan Covid-19 dose kima an lakna certificate an neih emaw, darkar 72 chhunga mi negative RT-PCR report an neih emaw chuan state chhunga luh hnuah test leh kher an ngai lo tih a sawi.

Sikkim : Sikkim sorkar chuan an state-a lut turte chuan RT-PCR negative report, darkar 72 huam chhunga mi an neih a ngai tih a sawi.

Delhi : Delhi sorkarin kaihhruaina a siamah chuan, Delhi khawpuia lutte chu sample laksakin thermal screening neihsak vek tur a ni. An positive a nih chuan inah emaw, damdawi-inah emaw ni 10 chhung inkhung a ngai a ni. Zin mite chu Aarogya Setu app hmang vek turin a ti bawk.

Madhya Pradesh : Madhya Pradesh-a lutte chu thermal screening neihsak vek an ni ang. Maharashtra aṭanga kal turte chuan darkar 72 huam chhunga mi RT-PCR negative report an neih a ngai.

Andhra Pradesh: Maharashtra, Delhi, Gujarat, Rajasthan leh Madhya Pradesh aṭanga Andhra Pradesh-a kalte chu Covid-19 test neihsak zel an ni dawn a, ni sarih inkhung tura tih an ni. State dang aṭanga lutte chu test kher loin ni 14 inkhung tura tih an ni bawk.

Tamil Nadu : Maharashtra, Delhi leh Gujarat aṭanga kalte chu Tamil Nadu an thlenin Covid-19 test neihsak vek tur an ni a, state dang aṭanga kalte chu symptoms an neih chauhin Covid-19 test neihsak an ni ang.

Haryana : Khualzin lutte thermal screening neih vek a ni ang. Hri an kai a nih chuan ni 14 chhung in lamah inkhunghrang tura tih a ni.

Nagaland : Nagaland sorkar chuan khualzinte chu ni 14 chhung quarantine-na hmuna awm vek tura tiin, hemi hnu hian in lamah ni 14 dang inkhung leh turin a ti bawk.