Khuahkhirhna khauh tak hnuaiah Republic Day lawm

India Republic Day vawi 73-na chu nimin khan ram pumah lawm a ni a, mahse hri leng hluar zel avangin khuahkhirhna khauh tak siam anih avangin a lawmna hmunah mipui an pungkhawm thei lo a, programme-te pawh kum dang aiin tihtawi a ni hlawm.

A lawmna pui ber, Delhi-a Rajpath-ah pawh mi 5,000 chauh an kalkhawm. Naupang kum 15 hnuai lam kal phal a ni lo a, puitling pawh vaccine dose kima la tawh chin chauh kal phal a ni.

President Ram Nath Kovind-a'n hnam puanzar a pawhpharh hnuah 21 gun salute pek a nih hnuah parade hi zing dar 10:30-ah ṭan a ni a, Lieutenant General Vijay Kumar Mishra-a'n a kaihruai a ni. Security force contingent-te chu sipai huaisen chawimawina, Param Vir Chakra leh Ashok Chakra dawng tawhten an ho bawk. Kuminah hian armed contingent chauh an tel a, contingent-te hi state hrang hrang tableaux-ten an zui a ni. Lamthiam 480-ten cultural performance an nei bawk a, lamthiamte hi rampum huap competition neih aṭanga thlan chhuahte an ni.

India Independence kum 75-na lawmna pualin Rajpath chungah aircraft 75-te thlawh tir niin mipui mit la ber zinga mi a ni. Tun hnaia Indian Air Force (IAF)-ten an dawn thar, Rafale jet panga pawh tel tir an ni. Indian army, navy leh air force-te aircraft hrang hrang an inlan a ni.

Delhi-ah venhimna uluk

Delhi Police-te chuan Republic Day lawmna turah firfiakte chetna thleng palh theih laka invenna tur hian a hma ni aṭangin venhimna khauh takin an kalpui ni.

Venhim hna thawk tur hian police 27,000 chuang dah a ni a, Delhi khawpui hmun hrang hrangah CCTV camera 500 chuang dahin, facial recognition software dah tel a ni bawk. Software-ah hian firfiak leh pawikhawihnaa inhnamhnawih mi 50,000-te database dah a ni. Tun kar tir lam aṭang khan firfiak pawl, al-Qaida nena inzawmna nei nia rinhlelhte thlalak chu Janpath leh Connaugh Place-ahte an lo tar bawk a ni.

PM-in sipai thite zahna hlan

Rajpath-ah Republic Day parade ṭan hmain, prime minister Narendra Modi chuan New Delhi-a National War Memorial (NWM) a tlawh a, ram tana nunna hlantu sipai thite zahna a hlan.

PM Modi hi defence minister Rajnath Singh, minister of state for defence Ajay Bhatt, defence secretary Ajay Kumar leh Indian Army, Air Force leh Navy-a hotuten an ṭawiawm. Modi hian sipai huaisente inpekna hriatrengna atan minute hnih ngawi rengin a ding a,memorial-a visitors' book-ah pawh a hming a ziak a ni.

India leh Pakistan sipaiten duhsakna inhlan

India Republic Day pualin nimin khan Attari-Wagah border-ah Border Security Force (BSF) leh Pakistan Rangers-te chuan duhsakna inhlanin, sweet-te an inthleng a ni.

BSF leh Pakistan Rangers-te hian festival pawimawh, Eid leh Diwali te bakah national day, Independence Day leh Republic Day-ahte duhsakna an inhlan tawn ṭhin mipui tel an remti dawn lo tih an sawi.