J&K local poll neih hun sawn mai thei

Jammu and Kashmir-a October chawlhkar hmasa bera local body election neih tur chu regioinal party lian pahnih, National Conference leh Peoples Democratic Party (PDP) ten an boycott tur thu an sawi hnuah, inthlan neih hun tur hi sawn a ni mai thei nia sawi a ni.

Inthlan neih hun tura thutlukna hi Jammu and Kashmir Governor Satya Pal Malik-a kaihhruai State Advisory Council (SAC) chuan a siam ang. J&K hi June thlaa BJP-in PDP kaihhruai sorkar a thlawpna a hnuhdawh hnuah Governor's Rule hnuaiah dah a ni.

Regional party NC leh PDP chuan Jammu and Kashmir mite tana 'permanent residents' pekna, Article 35A chungchangah sorkar laipuiin a dinhmun a tihchian hma chuan local body election neih hi an duh lo a ni. He article hnuaiah hian J&K-a cheng nghet, permanent resident-te chu ram neih chungchangah, sorkar hna, scholarship leh public aid leh welfare dangah hamṭhatna leh duhsakna pek an ni. Mahse he article hi India inpumkhatna boruak kalh zawng leh, ram mipuite thliarna nia sawiin Supreme Court-ah petition thehluh a ni. State dang miten J&K-a ram an nei thei lo leh, sorkar hna an hmu thei lo chu fundamental rights palzutna niin an sawi.

Chief Justice Dipak Misra kaihhruai Supreme Court bench chuan Article 35A chungchang hi Constitution Bench thutlukna siam tur niin a sawi. Hetihlai state mipuite leh regional party-te chuan Article 35A hi humhalh zel an phut thung.