Telangana : Congress, TDP, CPI-ten thawhho tum

Telangana-a eptu party pathum, Congress, Telugu Desam Party (TDP) leh Communist Party of India (CPI) chuan assembly inthlan lo awm turah rorellai, Telangana Rashtra Samithi (TRS) bei let tura thawhho an rel a, assembly inthlan neih hma chu President's rule-ah an state dah turin an phut nghal bawk.

Eptu party pathum hruaitute chuan Governor ESL Narasimhan an hmu a, President's rule-a dah an duh thu hi an hrilh a ni. Eptu ṭangrualte hian pawl hrang hrang thlawpna hmuh tumin hma a la nghal a ni.

Telangana-a AICC-in-charge of Congress affairs RC Khuntia chuan bul an ṭanna chauh a ni tih a sawi a, seat insem dan chungchang pawh an la rel lo tih a sawi. Tun ṭum hi TDP-in kum 35 chhunga Congress party an thawhpuina hmasa ber tur a ni.

September 6 khan Governor Narasimhan chuan state assembly hi a ṭhiat a, mahse sorkar thar din a nih hma chu caretaker Chief Minister ni chhunzawm turin K Chandrasekhar Rao a ruat.

Thawhlehni khan Election Commission of India (EC) team chuan Assembly inthlan neih tur atana an inbuatsaih dan te thlirin, Telangana-a political party hrang hrang hruaitute leh official-te an kawm. EC team hian Commission-ah report thehlutin, hemi aṭang hian assembly inthlan neih hun tur siam a ni ang.