Covid-19 hri kai hmuh chhuah thar 24,850 awm
Hripui lengin ziaawm lam a pan hleithei lo a, nimina Ministry of Health and family Welfare-in report an tihchhuahah chuan hri kai hmuh chhuah thar 24,850 lai an awm leh a, hri kai hmuh chhuah thar tam ber ni a ni leh a ni.
India ramah hian hri len ṭan tirh aṭanga nimin thleng khan Covid-19 kai mi 6,73,165 hmuhchhuah tawh niin heng zinga 2,44,814 chuan an la kai mek a, enkawl dam tawh hi an tam zawk hle thung. Mi 19,268 in an thihpui tawh a, nimina MoHFW report-ah hian mi 613 laiin an thihpui leh bawk.
Recovery rate a sang tawh
Nimin thleng khan hri kai mi 4,09,083 chu enkawl dam an ni tawh a, enkawl dam tawh rate pawh hi 60.77% a tling tawh. Darkar 24 chhungin mi 14,856 enkawl dam an ni leh a, enkawl dam hi nasa takin an pung a, hri kai mek aiin enkawl dam hi 1,64,269 laiin an tam zawk.
ICMR report
Indian Council of Medical Research (ICMR) chuan ni eng emaw zat chu ni khata Covid-19 sample test tam theih lamah record an siam tawh a, nimin pawh khan ni khata test tam ber ni record siam lehin mi 2,48,934 lai an test leh.
Hri len ṭan tirh aṭanga nimin thleng khan sample 97,890,66 an test tawh a, hetiang renga sample an test zat hi a pung chho zel a nih chuan kar loah mi vaibelchhe khat an test tling dawn a ni. ICMR hian testing facility lamah pawh nasa takin ṭan an la zel a, Covid-19 sample test-na atana pawmpui laboratory 1,100 nei tawhin heng zinga 786 hi sorkar laboratory a ni a, private laboratory 314 a awm bawk.
Maha-ah hri kai nuai hnih chuang awm tawh
India rama Covid-19-in nghawng a neih nasatna ber state Maharashtra-ah chuan hri kai hmuh chhuah thar 7,074 an awm leh a, nimin thleng khan hri kai 2,00,064 an awm tawh a ni. Hetih lai hian enkawl dam pawh nuai chuang awm tawhin 1,08,082 chu an dam leh tawh a, 83,311-in an la kai mek. Darkar 24 chhungin mi 3,395 an enkawl dam a, thihpui pawh 295 lai an la nei. Maha-ah hian Covid-19 vangin mi 8,671 an thi tawh a ni.
Hri kai tam ber dawttu state Tamil Nadu-ah pawh hri kai an pung zel a, darkar 24 chhungin hmuh chhuah thar 4,280 awm lehin mi 1,07,001 laiin an kai tawh. Enkawl dam 60,592 awm tawhin hri kai mek 44,959 an la awm a, mi 1,450-in an thihpui tawh bawk. Delhi-ah pawh nuai dawnin hri an kai tawh a, 97,200 laiin an kai tawh. Heng zinga 68, 256 chu enkawl dam an nih tawh laiin 25,940 chuan hri an la kai mek a, 3,004-in an thihpui tawh a ni.