CJI atan Justice Ranjan Gogoi ruat

Chief Justice of India Dipak Misra-an amah thlaktu atana Justice Ranjan Gogoi a rawt aṭanga ni sawm a ral hnuah sorkar laipui chuan Ningani khan CJI thar atan Gogoi a ruat fel ta.

CJI thar atana ruat Justice Gogoi hian October 3 aṭangin a hna thar hi a thawk ṭan dawn a, thla 13 chhung he hna hi thawkin kum 2019, November 17-ah a chawl ang.

President Ramnath Kovind chuan CJI atana Justice Gogoi ruatna hi ziakin, hriattirna hi tihchhuah nghal a ni. CJI thar ruat chungchang hi Rashtrapati Bhavan aṭanga tichhuak loin, Prime Minister Office (PMO) aṭanga puan a ni.

Justice Gogoi hi hmarchhak mi CJI ni thei hmasa ber a ni dawn a ni. Assam-a Dibrugarh-a piang niin, New Delhi-a St-Stephen's College aṭangin history-ah bachelor leh master degree a nei. Hemi hnu hian Dehi University-ah law a zir leh a, kum 1978 khan Guwahati-ah a thawk ṭan a ni. Kum 2001-ah Gauhati High Court permanent judge atan ruat a ni a, kum 2010 khan Punjab and Haryana High Court-ah sawn a ni. Kum hnih hnuah Supreme Court judge atan hlankai a ni leh a ni.