China-in India ram china luta puhna pha

China chuan an sipaite India ram china an lut nia puhna chu a pha a, ram pahnihte inremna lo siam tawh angin an sipaite chu Line of Actual Control-a an ram chin bak an pel ngai lo niin a sawi.

India-in August thla chhung khan China sipaite hian LAC chu ṭum thum pelin India ram chinah an lut nia media lama tarlana awm chu chhangin, China Foreign Ministry thupuangtu Geng Shuang chuan, "China sipaite hi LAC-a China lam chinah chauh an awm ṭhin a ni. China ram chhungah chauh patrol hi an nei ṭhin", a ti. Geng chuan President Xi Jinping leh Prime Minister Narendra Modi-te pawh ṭum eng emaw zat inhmu tawhin, border area-a ram pahnihte harsatna chinfelna tur leh boruak muanawm tak a awm theihna turte pawh lungrual takin an lo rel tawh a ni, tiin a sawi.

India leh China chuan ramri kaihhnawih thil sawidunna kawngah inbiakpawhna ṭha tak an nei a, hemi kaltlanga zela an harsatna chinfel ṭhin chu a ṭha niin Geng chuan a sawi. Media report vel lo lakvung vak chuan buaina chinfelna kawngah a pui dawn lo a ni, a ti.

News agency ANI-in a tarlan danin, August thla chhung khan China sipaite chu Uttarakhand-a India ram chinah ṭum thum an rawn lut a, ramri aṭanga km li thleng rawn kalin Chamoli district-a Baharoti khua an thleng niin a tarlang. Kum 2017 July thla khan China sipaite hi Barahoti-ah hian an rawn lut tawh bawk.

China leh India inrina, Line of Actual Control hi km 4,057 zet thui a ni a, sector pathum Northern, Middle leh Eastern sector-ah ṭhen an ni.