Chandrababu Naidu manna tur thupek tichhuak

Maharashtra court chuan Ningani khan Andhra Pradesh Chief Minister leh Telugu Desam Party (TDP) hotu N Chandrababu Naidu chu kum riat kaltaa Babli Project a dodalna kaihhnawih thubuaiah manna tur thupek a tichhuak.

Dharmabad Magistrate Court chuan Chandrababu Naidu bakah, Andhra Pradesh Cabinet Minister D. Umamaheshwar Rao leh midang 14-te manna tur thupek a tichhuak a ni. An vai hian September 21-a court-a inlan tura tih an ni.

Kum 2010 khan TDP chuan Maharashtra sorkarin Godavari luia Babli Project a siam chu dan kalh nia sawiin dodalna an lo lantir tawh a ni. Hetihlai hian Andhra Pradesh hi ṭhendarh a la ni lo a, Chandrababu Naidu hi eptu hruaitu niin an party MLA 40-te leh midang tam tak nen Maharashtra hi lutin, kal khap a ni chungin Babli Project siamna hmunah hian an kal a ni. Police-te chuan Naidu leh midangte hi manin, an lakah non-bailable case an siamsak.

Naidu-ate thubuai hi hawng thar leh tura ngenin tunhnaiah Dharmabad court-ah petition thehluh a ni a, hei vang hian court chuan manna tur thupek hi a tichhuak zui ta a ni.

TDP chuan an party hotu Naidu manna tur thupek tihchhuah chungchang hi na takin an sawisel a, he thilah hian a phenah Prime Minister Narendra Modi a inrawlh niin an puh.

Naidu-a fapa leh state Information Technology Minister N Lokesh chuan a pa leh TDP hruaitu dnagte chu court hmaah an inlan ngei dawn tih a sawi. A pa chuan Telangana ṭhatna turin theithawp a chhuah a, man a nih lai pawh hian bail-a chhuah pawh a dil duh lo a ni, a ti.