Kanpur-a police 8 kah hlum thubuaiah UP police-in an mite ngei an chhui

Zirtawpni liam ta khan Uttar Pradesh-a Kanpur-ah Vikas Dubey kaihhruai misual pawlte chuan Vikas Dubey man tura kal police pariat an kap hlum a, hemi thubuai chhuina kalzelah hian Uttar Pradeh police-te chuan tualchhung police officer-te an chhui.

Police-te hian nimin khan Vikas Dubey-a gang member zinga mi pakhat chu manin thu an zawhchiannaah police-te'n beihpui an thlak dawn tih hi police station-a mi hnen aṭangin thu an dawng tih a sawi a, hemi avang hian police station-a police-te chu an chhui zui nghal a ni.

Chaubepur police station in-charge Vinay Tiwari chu an suspend nghal a, thu zawtfiahin police station staff zawng zawng chu enthlak nghal an ni bawk. Kanpur police chief Mohit Agarwal chuan 'mafia tana spy' an hmu chhuak a nih chuan an chungah na takin hremna an lekkawh dawn tih a sawi.

Misual pawl zinga mi an man Daya Shankar Agnihotri chuan Vikas Dubey man turin police-te an kal tih chu Dubey chuan police station aṭangin phone call a dawn hmangin a lo hre lawk tih sawiin, hemi avang hian mi 25-30 rual chu biain  police lo kalte chu an lo lambun ta tih leh, hetih hunlai hian inah kalh khum a nih avangin engmah a hmu ve lo tih a sawi thu ANI chuan a tarlang.

Kanpur Shivli Power Sub-station operator Chhatrapal Singh pawhin pawikhawihna thlen ni, July 3 khan Chaubeypur Power Station aṭangin phone call a dawng tih leh Bikaru khuaa power cut tura thupek a dawn thu a sawi thu an tarlang bawk.

Police-te hi tualchhung mi hnen aṭangin Vikas hian thah a tum tih thu an dawn bawhzuiin beihpui thlak turin an chhuak a, Kanpur-a Shivrajpur, Bilhaur leh Chaubepur poilce ṭangkawpte chuan a rualin beihpui hi thlakin mi 25 lai an thawk chhuak a ni.

Inkahna thlenna hmun Bikru khua hi Lucknow aṭanga km 150 vel laka hlaa awm a ni a, Vinay Tiwari hian Vikas lakah hian thubuai a ziak lut duh loh avangin tualchhung mi report thlentu chuan DSP  Devendra Mishra a pan leh a, hemi vang hia Tiwari hian rinhleh a hlawh hle. Devendra Mishra hi police thi zingah hian a tel nghe nghe a, inkahna thlen hma lawk hian Tiwari hi a tlanchhia niin an sawi bawk a ni.