Thingtlang khaw 13,500 in school la nei lo

Ministry of Rural Development report-in a tarlan danin, ramchhunga state hrang hrangah thingtlang khaw 13,511 chuan school an la nei lo. State zingah Mizoram chauh chu khaw tina school nei awmchhun a la ni, a ti.

Ministry official chuan khaw tam takin school an la neih loh chhan hrang hrang a awm tih a sawi. State sorkarin a ngaihsak tawk lo vang te, khaw ṭhenkhat chu school dinna tur khawpin mihring an tam tawk loh vangte pawh a ni tih a sawi.

State hrang hrang zingah hmarchhak state-te chu an ziaawm hle a, Meghalaya state-ah thingtlang khaw 41 in school an la neih loh laiin, hmarchhak state dangah chuan school nei lo khua hi 10 aiin an tlem vek a ni.

Uttar Pradesh chu school awm lohna khua tamna ber state a ni a, Goa data erawh hmuh tur a awm ve lo thung.

National Institute of Rural Development, Hyderabad-a Professor HS Solanki chuan thingtlanga mite rilru puthmang hi hriatthiampui hmasak phawt a ngai tih a sawi. "Thingtlanga chengte chuan an fate lehkha zirtir lam aiin lo neih leh sum hmuhna tur hna thawh tir lam an ngaihven zawk a, hei vang hian khaw mite hnenah school din tura an rilru hminsak pawh thil harsa tak a ni fo. Zirna in lam aiin a fate hna thawhna an hmuh theihna tur industry dintute lo puih chu an duh zawk ṭhin. Hei vang hian an rilru puthmang hi thlak sak phawt an ngai a ni", a ti. Sorkar laipui chuan khaw tina school a din theihna tura tih takzeta hma a lak a ngai niin a sawi.