Fuel man la san belh zel

Ramchhunga fuel man sang chuan ziaawm lam a pan thei lo a, Pathianni thleng khan petrol leh diesel man an la to belh zel zawk.

Mumbai-ah chuan nimin khan petrol hi 89.29/litre-ah kaiin a san lamah record a siam. Diesel man pawh litre khatah pawisa 19-ah pungin Rs 78.26/litre a ni a, Mumbai-ah diesel man a la to ber ṭum a ni bawk. Delhi-ah chuan petrol hi Rs. 81.91 per litre -ah a kai chho bawk a, nimin khan litre khatah pawisa 28 in a pung leh a ni, diesel pawh litre-ah Rs 73.72 a kai chho bawk.

Diesel man hi August 1 aṭang khan 7% in a pung tawh a ni. Diesel man sang zel hian telecom company lam thlengin a nghawng buai tawh hle. Telecom company-te hian harsatna thuah nih an neih phah a, consumer-ten an tawrh dawn vangin vangin call rate an tisang mai thei lo a, hemi rual hian fuel man sang zel vang hian tuna an rate angah chuan hnathawh a harsa tawh nia sawi a ni.

Telecom industry hi diesel leitu pawimawh tak niin, kum khatah litre vaibelchhe 200 vel hmangin, fuel leina sum an sen hi cheng vaibelchhe 9,000 dawn a tling a ni. Hetihlai hian expert ṭhenkhat chuan global oil market-ah fuel supply hi duh khawp a awm loh avangin petrol leh diesel man hi a la san belh zel an rin thu an sawi.