Rajnath Singh-an smart fence pilot project a hawng

Union Home Minister Rajnath Singh chuan nimin khan Jammu and Kashmir-a India-Pakistan international border-ah 'smart fence' pilot project pahnih a hawng. He project hi Comprehensive Integrated Border Management System (CIBMS) programme hnuaia siam a ni.

Rajnath Singh hian nimin zing khan Jammu a thleng a, airport-ah Chief Secretary B.V.R. Subrahmanyam, Police Chief Dilbag Singh, Divisional Commissioner Jammu Sanjeev Verma, Inspector General Jammu S.D. Singh Jamwal leh Border Security Force (BSF) officer-ten lo hmuakin, hetaṭang hian BSF Paloura Headquarters a pan nghal a ni.

Minister hian International Border (IB) bula Makowal tlawhin, Swachh Bharat Abhiyan campaign-naah a telpui bawk.

Singh hian Jammu sector-a CIBMS hnuaia smart fence pilot project a hawn hi km 5.5 ve vea thui a huam a, heng hmunah hian high-tech surveillance system dahin, khawmual, tui leh boruak bakah underground-ah electronic barrier siam a ni dawn a, hei hian Border Security Force ten dan loa ramri kana India rama rawn luhruk tumte an venna kawngah nasa takin a pui thei dawn a ni. BSF officer-te chuan CIBMS hi hmun chhengchhe tak leh lui kawr hmunah hrehawm tak, mihring tana kal harsatna hmunahte hman a ni dawn tih an sawi.

Smart fence pilot project a hawn hnua Jammu-a press conference a neihah, Rajnath Singh chuan political party hrang hrangte chu J&K-a panchayat leh urban local body election neih tura tel turin a ngen. Regional party lian pahnih, National Conference (NC) leh Peoples Democratic Party (PDP) te chuan inthlan boycott an tum thu hi an lo puang tawh a ni. NC leh PDP hian sorkar laipuiin Constitution-a J&K tana special rights leh privilege pekna, Article 35A chungchangah a dinhmun a tihchian phawt loh chuan inthlanah hian tel an tum lo tih an sawi a ni.