SC-in activist-te house arrest hun pawtsei

Supreme Court chuan Koregaon-Bhima buaina kaihhnawiha man, Maoist hel nena inzawmna neia puh rights activist panga-te house arrest-a hren hun chu September 19 thlen atan a pawtsei.

Maharashtra police-ten an man, rights activist panga - Varavara Rao, Arun Ferreira, Vernon Gonsalves, Sudha Bharadwaj leh Gautam Navlakha te hi anmahni inah ṭheuh pawn chhuak thei loa hren a ni. Buaina chhuaka inhnamhnawiha puh an nih chungchangte chu zirchian a ni dawn tih sawiin, Chief Jutice Dipak Misra kaihhruai bench chuan finfiahna a awm leh awm loh zirchian a ni dawn tih sawiin, hemi chhung hian hren chhunzawm an la ni hrih dawn tih a sawi a ni. Thil dik tawk lo a awm anih chuan Special Investigating Team (SIT) chhuitir dan thlenga ngaihtuah a nih ang, a ti bawk.

Sorkar laipui chuan he thubuaiah hian SC chu inrawlh lo turin a duh a, hetihlai hian SC chuan police document-te enin, engmah finfiahna a awm loh chuan thubuai hi cancel nghal a nih tur thu a sawi. A ṭul a nih chuan a inrawlh dawn tih pawh a sawi nghal bawk a ni.