Feb 28 thleng Covid-19 guidelines pawtsei
Union home ministry chuan hri darh zel tur venna atana Covid-19 kaihhruaina dan hman mek chu, Disaster Management Act hnuaiah February 29 thleng a pawtsei.
Minister chuan thuchhuah siamin, January 31 thleng hman tura thuchhuah lo siam tawh chu ram chhunga hri lengin ziaawm lam a la pan mai loh avangin pawhsei a nih thu a sawi.
Union home secretary Ajay Bhalla chuan hri kai enkawl dam hi pung chak hle mah se, hri kai mek active case pawh an la pung zel tih a sawi. Hemi rual hian hri kai zinga damdawi-ina dah ngai zat erawh a hniam thung tih a sawi. "State leh Union territory 34-a district 407-ah positivity rate hi 10% chunglam an la ni a, hei vang hian ngaihtuah ngun ala ngai hle," a ti. State leh UT-te chu hri leng dona kawnga tha thlah mai lo turin a ti a ni.
Bhalla chuan five-fold strategy - test, tract, treat, vaccination leh Covid-appropriate behaviour chu zawm ṭhat zel a ṭul thu a sawi. State tina thuneitute chu Covid kaihhruaina dante khauh taka kengkawh a, face mask vuah leh punkhawmna hmuna social distancing dan zawmte chu ngai pawimawh chhunzawm zel turin a chah bawk.
Daily positivity rate tlahniam
India ramah Ningani khan Covid-19 hri kai thar 2,51,209 an awm a, a hma ni aiin hri kai hi 12% in an tlem. Daily positivity rate pawh 19.59% aṭangin15.88% ah a tla thla bawk a, weekly positivity rate chu 17.45% a la ni.
Hri kai, active case hi 21,05,611 awm mekin, hei hi hri kai hmuhchhuah tawh aṭangin 5.18% an ni. Hri kai enkawl dam, recovery rate a tlahniam leh a, 93.6% a ni.
Ningani khan hripui vangin mi 627 an thih belh leh a, India ramah Covid-19 vanga thi hi mi 4,92,327 an tling tawh. Health ministry chuan tuna hri leng thawh thar thleng mekah hri kai thihpui zinga 60% chu vaccine la miah lo leh, dose kima la lote an ni tih a sawi.
Drugs Controller General of India (DCGI) chuan India rama Covid vaccine siam chhuah pahnih, Covishield leh Covaxin chu market-a hralhchhuah a phalsak. Mahse damdawiin leh clinic aṭang chauha lei theih a ni hrih dawn nia sawi a ni.