FM Sitharaman-i'n paperless budget a pharh dawn

Union finance minister Nirmala Sitharaman chuan February 1-ah union budget 2022-23 chu paperless form hmangin a pharh dawn.

Budget session hi January 31 aṭangin neih ṭan a ni dawn a,session ṭanni hian president Ram Nath Kovind chuan Parliament in hnih hmaah thu a sawi ang. Session thawh khatna hi February 11 thleng neih a ni dawn a, thla khat an chawlh hnuah a thawh hnihna hi March 14-ah ṭan lehin, April 8 thleng neih a ni ang.

Ram chhunga hri lengin ziaawm lam a la pan loh avangin session pawh hi Covid kaihhruaina dan zawm chunga neih a ni dawn a, Parliament in hnihte hian a chhawkin rorel inkhawm an nei dawn a ni. Lok Sabha in rorel inkhawm an neih zawh hnuah, Rajya Sabha hian tlai lam aṭangin rorel inkhawm hi an nei ve leh ṭhin dawn a ni.

Finance minister Sitharaman hian February 1 chawhma dar 11-ah budget hi a pharh dawn a ni. Budget speech hi a tlangpuiin minute 90-120 inkarte an nei ṭhin a, mahse kum 2020 khan Sitharam hian budget speech rei ber neiin, minute 160 chhung hun a hmang.

Kumin budget hi paperless chhut chhuah a ni dawn lo a, sorkar laipuiin application a siam thar, Union Government Budget App aṭangin budget document hi MP bakah mipui nawlpui pawhin an download thei dawn a ni. He app hi Google Play store leh Apple IOS App store-ah download tur a awm. Union Budget web portal, www.indiabudget.gov.in aṭangin a download theih bawk ang.

LS Speaker-in all party meet a ko
Parliament budget session neih tur atana lo inbuatsaihna atan, Lok Sabha speaker Om Birla chuan January 30-ah all-party meet a ko.

Session ṭan hmaa all-party meet neih hi tihdan phunga an neih a ni a, he hunah hian party hrang hrang hruaitute telin Parliament session tluang taka neih a, rorel inkhawm mumal taka an neih theih dan turte an sawiho ṭhin.

Lok Sabha all-party meeting hi Pathianni chawhnu dar 3-ah neih a ni dawn a, tlai dar 5-ah Rajya Sabha lamin an nei ve thung ang. Rajya Sabha meeting hi virtual hmanga neih a ni dawn a, chairman M Venkaiah Naidu-a'n a kaihruai ang.