PM-in 2022-a Mann Ki Baat programme hmasa ber hmang

Prime minister Narendra Modi chuan thla tina Pathianni ni hnuhnung bera radio programme a neih ṭhin, Mann ki Baat chu kumina a hmasa ber turin nimin khan a hmang. Hei hi Man Ki Baat programme vawi 85 a hmanna a ni.

PM Modi chuan ram mipuite National War Memorial tlawh turin a ngen a, hei bakah eirukna umbo a ṭul thu sawiin,eiruk chu chhung lam aṭanga eichhetu a ni a, lakluh a ni tur a ni lo, a ti.

Nimina Maan Ki Baat hun a hmana PM thusawi ṭhenkhatte -
1) PM hian nimin khan Mahatma Gandhi thih champha a nih thu sawiin, January 30 chuan Gandhi zirtirna hrang hrangte a hriatchhuah nawn tir leh a sawi.
2) 2022 Republic Day lawmna neih zawt tak chungchang pawh sawiin, Rajpath-a India thil ropuina leh chakna pholante chuan ram mipuite inchhuanna leh phurna a pe a ni, a ti.
3) India ram chu zirna leh hriatzauna lama ram ropui a ni tiin, Pandit Madan Mohan Malviya, Mahatma Gandhi, Maharaja Gaikwad, Ambedkar leh Shri Aurobindo-te chanchinte a sawi chhuak.
4) Covid-19 hri leng thleng leh mek chu hlawhtling taka beih let a ni, a ti. Puitlingte vaccine pek an nih hnuah tleirawlte pek ve leh mek an ni a, "Tunah hian tleirawl vaibelchhe li leh a chanve velin Corona vaccine an la tawh. Kum 15-18 inkar zinga 60% chuan kar thum - kar li chhungin vaccine hi an la hman tihna a ni," a ti.
5) Vaccine an lak avangin naupangte hi hri lakah an him tihna a ni lo a, mahse an zirna chhunzawm zel thei turin a pui a ni, tiin a sawi.
6) Ram mipuite chu Swachhta Abhiyan leh Atmanirbhar Bharat campaign-te theihnghilh lo turin a chah bawk.
7) Single-use plastic hmang lo tura campaign neih zel a ṭul thu a sawi bawk a ni.