Afghanistan tan damdawi ton 3 thawn

India chuan Afghanistan ram ṭanpuina turin a ṭum lina atan Inrinni liam ta khan damdawi ton 3 a thawn.

Hemi hma hian damdawi hi ton 3.6 bakah Covid-19 vaccine dose nuai nga a lo thawn tawh bawk. Pakistan ram kaltlanga land route hmanga wheat ton 50,000 thawn a tum erawh chu a kalkawng turah Pakistan lamin an la tihfel loh avangin nikum October thla aṭang khan dan a ni rih. Covid vaccine dose nuai nga dang chu thawn leh thuai a tum bawk a ni.

Inrinnia damdawi thawn hi Kabul-a Indira Gandhi Institute of Child Health kutah hlan a ni tih external ministry chuan a sawi. Ministry thuchhuah chuan, Afghanistan mipuite nena inzawmna ṭha tak an lo neih tawh chu India chuan a vawn chhunzawm zel dawn a, a theih angin chhawmdawlna pawh pek zel an tum tih a sawi. A hmaa damdawi leh chhawmdawlna thil dang an lo thawnte pawh Indira Gandhi Institute of Child Health lehWorld Health Organisation (WHO) hnenah an hlan a ni.

Afghanistan-a Taliban sorkar chu India hian a la pawmpui lo a, mahse hetichung hian mipuite harsatna nasa tak an tawh avangin chhawmdawlna hi a theih angin a thawn lut thung. Taliban pawhin India puihna avanga an lawm thu an sawi.

United Nations chuan Afghanistan mipuite chhawmdawlna atan kumin atan USD tluklehdingawn riat dawn mamawh a ni tih a sawi. Afghan mipui maktaduai 23 te chu ṭanpui ngaiin an awm a, hei bakah hian naupang maktaduai khat chuang chu ei tur khawpkham loh vangin dinhmun ṭha lo takah an ding mek niin UNICEF chuan a sawi bawk.