Court-in Kejriwal leh AAP MLA-te ko

New Delhi-a Patiala House Court chuan Delhi Chief Minister Arvind Kejriwal leh Aam Aadmi Party (AAP) MLA ṭhenkhatte chu chief secretary kutthlak a nih chungchangah October 25 hian court-a inlan turin a ko.

Delhi Police-te chuan nimin khan Delhi chief secretary Anshu Prakash kutthlak a nih kaihhnawihah court-ah chargesheet an thehlut. Police-te chuan phek 3,000-a chhah chargesheet an thehluhah hian CM Kejriwal, deputy chief minister Manish Sisodia leh AAP MLA 11-te chu bureaucrat kutthlak a nih chungchangah mawhphurtuah an puh a ni. CM leh a MLA-te chu dik lo taka bureaucrat hi hreng leh, tum reng vanga tiel leh dan loa pungkhawmah puh an ni.

Anshu Prakash hian kumin February thlaa zan rei tawh taka Chief Minister House-a meeting an neih ṭumin TV campaign kum thum champhana tihchhuah tlai chungchangah kut thlak a ni tih a sawi. AAP MLA Amanatullah Khan leh Prakash Jarwal te chuan an vau a, kut an thlak zui niin a complaint thehluhah a tarlang. He thil thlen vang hian Delhi sorkar leh bureaucrat-te inkarah pawh harsatna thlengin hun eng emaw chen sorkar chu hna thawk thei loin a awm phah a, June thla khan an buaina hi an chingfel thei chauh a ni.

Hetihlai hian AAP sorkar chuan police chargesheet thehluha an puhna chu thu dik lo leh nuihzatthlak zawk niin a sawi a, Modi-a kaihhruai sorkar mangang thiltih a ni, a ti.

Chief Minister leh MLA-te hi thubuaiah hian thiam loh chantir an nih chuan kum sarih thleng lung-in tantir theih an ni ang.