Karnataka MLA-ten sum lalut hnem

Ramchhunga MLA te zingah Karnataka MLA-te chu hlawh sang ber niin, Karnataka MLA 203-te sum lak luh zat hi chawhrualin mi pakhatin kum khatah cheng nuai 111.4 a lalut pha a ni.

Karnataka MLA-te hi Maharashtra MLA 256-te chuan an dawt a, mahse an sum lakluh zat a inthlau hle. Maharashtra MLA-te kum khat sum lakluh hi chawhrualin cheng nuai 43.4 a ni.

Association for Democratic Reforms (ADR) leh National Election Watch (NEW) te chuan MLA nilai 4086 zingah legislator 3,145 te affidavit a zirchianna aṭangin he report hi a siam a ni. MLA 941 chuan an affidavit-ah an sum lakluh zat hi an tarlang tel lo.

MLA ṭanglai 3,145 te kum khat sum lakluh hi chawhrualin cheng nuai 24.59 a ni. Chhim lam biala MLA 711-te sum lakluh hi MLA pakhatah Rs nuai 51.99 a tlin laiin, khawchhak lam biala MLA 614-te sum lakluh chu, mi pakhatin kum khatah Rs nuai 8.53 a lalut pha chauh thung.

Chhattisgah Assembly-a MLA 63-te chu sum lalut tlem ber niin kum khatah MLA pakhat lakluh chu chawhrualin Rs nuai 5.4 a ni a, hei hi MLA 72 awmna Jharkhand chuan dawtin Rs 7.4 zel lalut ang an ni.

ADR leh NEW-in MLA 3,145 te affidavit a zirchiannaah hian mi 55 chuan an hna an ziak lang lo a, 771 chuan sumdawng tia inziakin, 758 chuan loneitu an inti thung. Hna hrang hrang zingah agriculturist leh sumdawng nia inziak, MLA 397-te sum lakluh chu chawhrualin a sang ber a, kum khatah Rs nuai 57.81 an lalut pha a ni. Housewife, zirtirtu, pensioner leh lawyer-te chu sum lalut tlem zingah an tel.

Affidavit-ah hian MLA 1,052, an educational qualification-a Class 5-12 inkarte sum lakluh chawhrual chu Rs nuai 31.03 a ni a, graduate leh a chunglam MLA 1,997-te kum khat sum lakluh chu chawhrualin Rs nuai 20.87 a ni thung.

MLA zingah kum 25-50 inkar, mi 1,402 te kum khat sum lakluh chawhrual chu Rs nuai 18.25 a nih laiin, kum 51-80 inkar MLA 1,727 te sum lakluh chawhrual chu Rs nuai 29.32 a ni thung. MLA 11, kum 81-90 inkarte kumkhat sum lakluh chu chawhrualin Rs nuai 87.71 a ni a, kum 90 chunglam MLA pahnihte chuan kum khatah Rs nuai 60.91 lalut ve ve ang an ni bawk.

Hmeichhe MLA 258 awmin, an sum lakluh hi chawhrualin kum khatah Rs nuai 10.53 sa ni a, mipa MLA-te sum lakluh chawhrual chu Rs nuai 25.85 a ni thung.