Eng party mahin inthlan buatsaih dan min hrilh tur a ni lo : EC

Election Commission chuan eng political party mahin inthlan buatsaih dan tur a hrilh tur a ni lo tiin Supreme Court a hriattir.

Congress party-in Madhya Pradesh leh Rajasthan electoral roll-a duplicate vote tam tak a awm nia sawi a chungchang a chhannah EC chuan he thu hi a sawichhuak a ni. EC chuan inthlan kaihhnawiha thutlukna chu Election Commission of India kutah awm a ni tiin, party emaw mimal emaw in tihtur a duh dan angin a kaltir ngawt thei lo, a ti.

EC chuan Congress thusawi hi thil dik lo leh hriat fuh lo vang niin a sawi a, inthlan buaipui dan chu dik leh thianghlim taka kalpui a ni a, inthlan felfai leh zalen tak buatsaih chu a tum ber a ni, a ti.

Congress party hruaitu pahnih Kamal Nath leh Sachin Pilot-te chuan SC-ah hian kumina assembly inthlan neihna tur state pahnihah electoral roll-a voter list-ah hming lem tam tham tak a awm niin an thlen a ni. Party hruaitute hian Madhya Pradesh bikah ringawt pawh duplicate voter hi nuai 60 vel an awm niin an sawi.

Mahse EC chuan court-ah hei hi chhangin, Congress-in complaint a thehluhnaa an behchhan chu a rintlak tawk lo niin a sawi a, hei bakah hian voter lem nia an sawi mi maktaduai 60-te enfiahna tur pawimawh an kum zat leh thlalakte pawh an telh lo a ni, tiin a sawi.