UP-ah SP leh BSP thawkdun dawn : Akhilesh Yadav

Samajwadi Party (SP) chief Akhilesh Yadav chuan kum 2019 Lok Sabha inthlanpui neihah Uttar Pradesh-ah Bahujan Samaj Party (BSP) nen an thawkdun dawn tih a sawi.

Hemi hma hian BSP hotu Mayawati-i chuan an party-in seat insem chungchangah an duh ang an chan theih dawn chuan anti-Bharatiya Janata Party (BJP) alliance-ah tel an hreh lo tih a lo sawi tawh a, mahse seat hi an duh ang pek an nih loh chuan party mala chuh mai an duh zawk tih a sawi bawk.

Lucknow-a SP headquarters-a thu a sawiah Yadav chuan, "Tunah chuan ram mipuiten inthlak danglam an duh tawh a, UP hi an thlir ṭhup a ni. BJP hian awm ngaihna pawh an hre tawh lo a, khawtlang nun leh ram economy thlengin an tichhe tawh a ni", a ti. BJP sorkar hnuaiah mi rethei tan chan an nei lo a, ramchhungah thil man a sang zel a, pawisa note tihthih niin Goods and Service Tax (GST) chuan ram economy a tichhe hle bawk a ni, a ti.

"BJP te chu chhuahtir an hun tawh a ni. BJP paihthlakna tur hian ṭangrual pawl kan din ngei dawn a ni", tiin UP chief minister hlui chuan a sawi.