CBI-in law firm lian ber chhui chiang

Central Bureau of Investigation (CBI) chuan India rama law firm lian ber, Cyril Amarchand Mangaldas (CAM) chu Punjab National Bank (PNB) aṭanga dik lo taka cheng vaibelchhe 13,000 lakchhuah kaihhnawih thilah a chhui chiang.

Kumin February thla khan CAM compound aṭang hian PNB-a thil dik lo thleng kaihhnawih document man a ni tih sorkar leh police lam aiawhte chuan an sawi.

PNB hian January thla khan billionaire Nirav Modi leh a pu Mehul Choksi-te chuan kum eng emaw zat chhung chu bank-a staff ṭhenkhatte nen inthurualin dik lo takin sum tam tham tak an lo siam niin a sawi a ni. February thla laihawl vel khan Nirav-a thurualpuite hian Mumbai-a a diamond firm-a document tam tham tak chu CAM office-ah hian a thawn a, mahse hengte hi police-te chuan February 21 khan an mansak a ni.

CAM hian Nirav Modi nen an inlaichin dan chungchang hi a sawilang duh lo a, mahse an firm chuan dan ang taka thil engkim an tih thu leh, thil chhui lai mek chungchangah engmah sawichhuah an duh loh thu an sawi. Document an neih chhan pawh a sawifiah duh lo a ni. CAM-ah hian lawyer 600 chuang an awm a, company lian tak tak Alphabet Inc’s Google, Microsoft, Standard Chartered leh ICICI Bank tan pawh an lo thawksak tawh a ni.