Parliament Budget Session ṭan, joint sitting hmaah President-in thu a sawi

Parliament budget session chu nimin aṭang khan ṭan a ni a, session ṭan ni hian president Ram Nath Kovind chuan Parliament in hnih joint sitting hmaah thu a sawi.

President Kovind chuan India-in zalenna a nei theihna atana zalenna sualtu mi nuai telte chu zahna a hlan tih sawiin, India ram hmasawnna atana an theih anga tha thawhtu zawng zawngte an hriatreng thu a sawi bawk.

Prime minister Narendra Modi kaihhruai NDA sorkarin hlawhtlinna a neih hrang hrangte a sawi lang a ni. Covid-19 vaccination mega drive chungchang pawh sawichhuakin, vaccine pek chhuah hna kalpui a nih aṭangin kum khat pawh tling loah vaibelchhe 150 pek hman a ni a, precautionary dose pawh pek chhuah ṭan a ni tawh tih a sawi. Vaccine la thei chin zingah 70% chuangin dose hnihin an la tawh tih sawiin, India vaccine siam chuan mi vaibelchhe têl nunna a chhanhim tih a sawi. PM Ayushman Bharat Health Infrastructure Mission chuan nakin zela health system lama harsatna awm palh thei tur atana a lo buatsaih lawk a ni tiin a sawi bawk.

Tun hnaia sorkar laipuiin Padma award a pek chhuah pawh sawi chhuakin, democracy chu mitinte inzahtawnna a ni a, sorkar chuan mitinin rorelna dik an hmuh theihna turin theihtawp a chhuah zel a ni, a ti. Padma Award pawh hi inpumkhatna lantirna pakhat a ni tih sawiin, sakhua leh hnam thliar loin a phute hnenah pek ṭhin a ni, a ti.

Sorkar laipuiin New Education Policy a siam chu fakin, he policy hmang hian tualchhung ṭawngte pawh chawisan a ni, a ti. "India rama ṭawng hrang hrang hmanga entrance examination buatsaih dan turte pawh duan mek a ni. State 10-a engineering college 19-ah chuan kumin chhungin Indian ṭawng chi ruk-in a zir theih tawh dawn a ni," tiin President chuan a sawi.

Kawng dang danga sorkar laipui hlawhtlinna te tarlangin, 'Har Ghar Jal initiative' hnuaiah thingtlang lama cheng chhungkaw vaibelchhe ruk chuang chuan an in ngeiah tap water an nei thei a ni, a ti.

India agriculture export pawhin cheng vaibelchhe nuai thum a pel tih sawiin, hri leng karah ram chhunga loneitute chuan kum 2020-21 chhung khan chaw lam chi ton vaibelchhe 30 leh horticulture produce ton vaibelchhe 33 an tharchhuak thei a ni, a ti.

President chuan PM-KISAN hnuaiah loneitu chhungkua vaibelchhe 11 chuang hnenah Rs vbc nuai 1.80 sem a ni tawh a, farm sector lamah a ṭha zawnga inthlak danglam lian tak tak a thleng tih a sawi. Sorkarin wheat metric ton nuai 433 chuang a lei a, hei hi loneitute nuai 50 chuangin an hlawkpui tih a sawi bawk.

Defence contract peknaah sorkar laipui chuan 'Make in India' chu a dah pawimawh ber a ni tih President chuan a sawi a, armed force-te hman ṭhin item 209 chu ram pawn aṭanga lalut loin, ram chhunga siam ngei an hmang tawh dawn a ni, a ti.

FM-in Economic Survey a pharh
Union finance minister Nirmala Sitharaman chuan nimin khan Lok Sabha-ah Economic Survey 2022 a pharh nghal bawk.

April thla aṭanga fiscal year thar inṭan turah India economy ṭhanna chu 8 - 8.5% vel anga chhut a ni a, hei hi fiscal year kallai mek growth rate 9% aiin a hniam dawn a ni.

Hri lengin sector hrang hrang a nghawng meknaah, agricultural sector chu a nghawng nat loh ber tur nia ngaih ani a, 2021-2022-a a growth rate hi 3.9% ni tur chhut niin, a hma kum hniha a ṭhanna hi 3.6% leh 4.3% an ni. He sector hi GVA-ah 18.8% a tling pha.

Vawiinah union budget pharh dawn
Union budget 2022-23 chu vawiin hian union finance minister Nirmala Sitharaman chuan a pharh dawn.

Budget thar hi paperless form-a pharh a ni dawn a, chawhma dawr 11-ah Sitharaman hian budget speech a nei ṭan ang.

Budget speech hi darkar hnih chhunga khung len a ni tlangpui a, mahse Sitharaman erawh hian hun a hmang rei deuh ṭhin. Kum 2020 khan darkar hnih leh minute 40 chhung hun a hmang a, kum 2019 khan darkar hnih leh minute 17 a hmang bawk. Kum 2021-ah erawh chuan darkar khat leh minute 40-ah a zo hman a ni.