Kartina hri kai thar tlahniam; thihpui 41% in a pung thung

India rama Covid-19 hri leng thawh thumna thlen chhunga kartina hri kai thar zat chu a vawi khatna atan a tlahniam a, hri vanga thihpui erawh a kar hmasa leh ai khan 41% zetin a sang zawk a ni.

Kar liam ta (January 24-30) chhung khan hri kai thar nuai 17.5 an awm a, a kar hmasa leh aiin 19% in a tlahniam a, ramchhunga hri leng chuan a peak a thleng tawha ngaih a nih laiin state ṭhenkhatah erawh hri kai hian san lam an la pan zel. Hetih lai hian, kar hmasa leh aiin ni sarih liam ta chhung khan Covid testing chu 10% in a tlem zawk a ni. Hetichung hian, India test positivity rate chu 15.68%-a tlahniamin, a kar hmasa khan 17.28% a ni.

January 17-23 kar khan ramchhungah hri kai thar nuai 21.7 awmin, hri leng thawh thumna chhunga kar khata a san ber ṭum a ni.

Covid vanga thi zat chu pung zel mah se hri leng dang nen khaikhin chuan thihpui hi an la tlem zawk a ni. India-ah kar liamta khan Covid-19 vanga thi mi 3,770 an awm a, a kar hmasa leh khan thihpui 2,680 an awm thung. Ni thum chhung chu nitina thihpui chu mi 550 chunglamah a awm mek a, Pathianni khan thihpui 564 awm lehin, state pahnih data chu Pathianni zan thleng khan result kimchang an la neih theih loh avangin belh tel an ni lo.