President-in Triple Talaq ordinance pawm

Union cabinet-in Muslim mipaten an nupuite awlsam taka an ṭhen theihna dan, triple talaq hman khapna thupek, ordinance chu a pawm hnuah, nimin khan President Ram Nath Kovind chuan he ordinance hi pawmin a hming a ziah hnan ta.

Muslim mipate chuan an nupuite hnenah talaq tih hi a zawna vawi thum an sawi emaw, ziaka an thawn emaw chuan dan ang takin an ṭhen nghal thei a, hei hi triple talaq emaw, talaq-e-biddat emaw tih a ni ṭhin. He inṭhenna dan hi India rama Muslim ten an hmang ṭhin a ni. He dan hian sawisel a hlawh hle a, nikum khan Supreme Court chuan triple talaq hi dan kalh leh ram danpui nena inmil lo tak a ni tih pawh a lo sawi tawh a ni. Lok Sabha-ah pawh triple talaq khapna bill hi pass ni tawhin, Rajya Sabha-ah erawh tihkhawtlai a la ni. Hetichunag hian he dan hi Muslim mipaten an la hman chhunzawm reng a ni.

Cabinet-in triple talaq ordinance a pawm hmang hian he dan hmanga nupui ṭhente chu dan bawhchhia, bail theih loha man theih an ni tawh dawn tih Law Minister Ravi Shankar Prasad chuan a sawi. A nupui ṭhen tak thusawite ngaihthlak a nih hnuah, magistrate chuan a ṭul dan azirin bail hi a pe thei dawn chauh a ni. Hmeichhia an fate, kum la tling lote enkawl leh a pasal lak aṭanga zangnadawmna pekte a dil thei dawn bawk.