Jet Airways flight-a chuangten harsatna tawk

Mumbai-Jaipur inkar thlawk, Jet Airways thlawhtheihnaah a thawktuin cabin pressure vawnna tur switch a tihnun theihnghilh avangin passenger-ten harsatna an tawk a, passenger zinga 30 vel chu an beng leh hnarah te thi a chhuah phah.

Boeing 737 flight-a cabin pressure tlakhniam vang hian oxygen mask-te pawh pekchhuah a ngaih phah a, thlawhtheihna hi Mumbai-ah thlawk kir lehnghalin passenger zinga harsatna tawkte hi airport-ah doctor-te an lo enkawl nghal a ni.

Zing dar 6-a Mumbai aṭanga chhuak thlawhtheihna, flight 9W 697-ah hian khualzin 166 leh thawktu panga an chuang an ni. A thlawh san lai hian Jet Airways-a thawktute hian cabin pressure vawnna tur, 'bleed switch' tih chu an tihnun theihnghilh nia sawi a ni. Hei vang hian air pressure chu nasa takin a tlahniam nghal a, passenger-te hian mask-te an vuah a ngai a ni.

Directorate General of Civil Aviation chuan he thlawhtheihna khalhtu pilot pahnih-te chu a chawlhtir nghal a, Ministry of Civil Aviation (MoCA) pawhin DGCA hnenah thil thlen dan report kimchang pe turin a hrilh nghal bawk.