J&K : Firfiakten police an ruk bo pathumte that

Jammu and Kashmir-a firfiakten an rukbo, police pathum ruang chu nimin khan hmuh an ni a, pahnih hi Special Police Officer (SPO) an ni.

Ningani zan khan South Kahmir-a Shopian aṭangin SPO pathum leh constable pakhat hi chin hriat lohin an bo a, Hizbul Mujahideen firfiakte rukbo nia hriat an ni. HM hian a hmain SPO te hi bang tura vauna audio clip an lo thawn tawh a ni.

Police official-te chuan rukbo an nih chungchang hi an sawilang duh lo a, mahse nimin zing khan police pathumte ruang hi Shopian-a Lamni-Wangam khuaah hmuh ni ta a ni. An taksaah hian silai kahna hnu eng emaw zat hmuh tur a awm bawk.

Firfiakten an kahhlum police-te hi Batgund khaw mi Firdous Ahmad Kuchey leh Kuldeep Singh bakah Kapran khaw mi Fayaz Ahmad Bhat-te an ni. Heng mi pathumte ruala rukbo, Fayaz Ahmad-a unaupa Nisar Ahmad chu a hnuah an chhuah leh a ni.

J&K police-te chuan pawikhawihtute zawn hna hi thawh nghal a ni tih sawiin, man ngei tumin beihpui an thlak mek tih an sawi.

Nimina firfiakte thah, police pathum ruang hmuh anih hnu lawkah Jammu and Kashmir-a police pathum chuan banna an thehlut nghal. Banna thehlut zingah hian SPO pahnih an tel.

Thla hmasa khan HM firfiakte hian Shopian, Kulgam, Anantnag leh Awantipora-ah J&K Police leh Army-a thawk chhungte mi pakua an lo rubo tawh bawk. Rukbo an nih hnuah HM commander Riyaz Nakoo chuan minute 12 awh video tichhuakin, an pawl rukbo ngei an nih thu leh, an mi rukbote chhuah a nih theih nan police kuta tang mek HM firfiak pawl member leh an chhungte chu ni thum chhunga chhuah vek turin a ti a ni.