BSP leh Janta Congress Chhattisgarh thawkdun dawn

Chhattisgarh Assembly inthlan neih tura Maywati-i party, Bahujan Samaj Party (BSP) leh Ajit Jogi-a kaihhruai Janta Congress Chhattisgarh te chuan thawhdun an remti.

BSP chuan party pahnih ṭangrualten sorkarna an siam a nih chuan Ajit Jogi chu chief minister a ni dawn tih a sawi.

Mayawati-i chuan Janta Congress Chhattisgarh nena an thawhdun tur thu hi sawiin, BSP chuan seat 35 a chan dawn a, JCC hian seat 55-ah an chuh dawn tih a sawi. SBP chuan an party-in seat a duh zat ang pe thei tur party chauh a thawhpui thei tih a sawi bawk.

Party pahnih thawkdunte chuan Dalits leh hnam hnuaihnung dangte chawikanna turin an thawk dawn a ni, a ti.

Ajit Jogi chuan BJP chuan eptu lam tana harsatna siam tumin kawng hrang hrangin an bei ngei dawn tih a sawi a, mahse BSP nena thawkdunin BJP chu an dangchat thei ngei dawn niin a sawi. "BJP hian Chhattisgarh-ah kum 15 chhung ro a rel tawh a, thuneihna chang tur chuan dik lo taka thiltih leh, pawisa hmanga tlin pawh an pawisa lo a ni. Mahse BSP nena kan thawhdun chuan kan lo dang thei dawn a ni", a ti.

Congress party chuan Chhattisgarh-ah hian party mala sorkarna an siam theih tur thu a sawi. Congress General Secretary leh Chhattisgarh in-charge PL Punia chuan BSP hian thawhpui tura an sawm thu a sawi a, mahse Congress chuan party mala inthlan hmachhawn hi a tum zawk a ni, tiin a sawi.

Hetihlai hian assembly inthlan neihna tur dang, Madhya Pradesh-ah chuan BSP leh Congress hian thawhdun dan ngaihtuahin inbiakna an nei mek thung. Karnataka-ah chuan BSP hi JD(S) nen an thawkdun dawn a, Uttar Pradesh-ah poltics lama an hmelma lian tak ni reng ṭhin, Samajwadi Party nena thawhdun an tum bawk.