PM-in mega health scheme a hawng

Prime Minister Narendra Modi chuan khawvel huap pawha sorkar hnuaia healthcare programme lian ber tura ngaih, Ayushman Bharat - Pradhan Mantri Jan Arogya Abhiyan (AB-PMJAY) chu nimin khan Jharkhan khawpui Ranchi-ah a hawng.

Centre flagship scheme, AB-PMJAY hmang hian Narendra Modi-a kaihhruai NDA sorkar chuan ramchhunga thingtlang leh khawpui biala mi rethei chhungkaw vaibelchhe 10 chuangte hnenah heathcare facilities pek a tum a ni. Nimin vek khan NDA chief minister-te chuan an state-ah ṭheuh he scheme hi an hawng ve nghal bawk.

Scheme hi Pandit Deendayal Upadhyay-a piancham, September 25 aṭangin kalpui ṭan a ni dawn tih Niti Aayog member VK Paul chuan a sawi.

Khawvela health financing scheme lian ber tur, PMJAY scheme hian chhungkaw vaibelchhe 10 chuang, mi vaibelchhe 50 dawn a huam dawn a, heng mite hnenah hian insurance cover Rs nuai 5 thleng pek theih an ni ang. Kumin Independence Day lawmnaa thu a sawiah khan PM Modi chuan scheme thar siam tur hi a lo puang tawh a ni.

PM Modi chuan Ayushman Bharat-PMJAY chu khawvela sorkar sponsored health scheme lian ber a nih thu a sawi, Agushman Bharat hamṭhatna dawng thei tur chu America, Canada leh Mexico ram pathum mipui ai pawhin an tam dawn a ni, a ti. Khawvela pawl hrang hrang pawhin he scheme hi an la zirchiang ngei ang, a ti.

Ayushman Bharat siam a nih chhan
* Health ministry official-te chuan National Sample Survey Organization (NSSO) round 71-na aṭanga a landanin, thingtlang biala chhungkaw 85.9% leh khawpui biala chhungkhaw 82% te chuan healthcare insurance an nei lo.

* Rural area-a chhungkaw 24% leh urban area-ah cheng 18% te chuan damdawi lama an inenkawlna senso te hi an puk chawp a, hei hi Ayushman Bharat hmang hian thlak danglam tum a ni.

* Niti Aayog member VK pual chuan he scheme siamna kawnga a puipa ber chuan fiscal year kal meka scheme atana sorkar laipui sum sen tur chu cheng vaibelchhe 3,500 a ni tih a sawi. Heng zinga 60% chu sorkar laipui tum tur niin, a bak chu state sorkarten an tum thung ang.

Ayushman Bharat thil tum
* Ayushman Bharat scheme hian chhungkaw vaibelchhe 10, mi vaibelchhe 50 velte damdawi lama an inenkawlna tur a tumsak dawn a ni. Mi pakhat hnenah kum khatah cheng nuai 5 thleng pek theih a ni ang.

* Scheme hian mi rethei, chhungkaw harsa te a thlurbing dawn a ni.

* Health ministry chuan he scheme hnuaia inenkawl theihna chi 1,345 a siam.

* Scheme hmang theite hnenah hian cashless leh paperless service pek an ni ang. Sorkar damdawiin leh private hospital thlan bikahte hman theih a ni ang.

Scheme hmang thei tur te
* He scheme hmang thei turte chu SECC database-a criteria hmanga thlan a ni ang. Caterogy D1, D2, D3, D4, D5 leh D7 te huamin, urban area-ah chuan occupational criteria 11 hnuaia mite a huam bawk.

* State hrang hranga Rashtriya Swasthya Bima Yojna (RSBY) beneficiary-te telh nghal an ni.

* Chhungkaw member zat leh kum zat bithliah chin a awm lo.

* Scheme hmang turten Aadhaar card telh kher a ngai lo. ID card leh ration card te pawh hman theih a ni ang.

* Hospital-a dah luhte chuan he scheme hnuaiah hian inenkawlna man pek a ngai lo. Mahse sorkar hospital emaw, he scheme hman theihna private hospital thlan bikah an awm erawh a ngai thung.

* National Health Agency (NHA) chuan he scheme pual hian website (mera.pmjay.gov.in) leh helpline number(14555) a siam.

* Hospital thlan chhuahte chuan beneficiary te puihna leh scheme a awmte enfiah theihna tur 'Ayushman Mitra help desk' an siam vek ang.

* Beneficiary zawng zawng hnenah QR code awmna lehkha pek vek an ni dawn a, hei hi hamṭhatna an dawn dawnah enfiahna atan hman a ni ang.

State leh Union Territory 30-te chuan Ayushman Bharat scheme kalpui tur hian sorkar laipui chu MoU an ziahpui tawh. Mahse Telangana, Odisha, Delhi, Kerala leh Punjab-te erawh chuan inremna an la siampui lo. He scheme hman theihna tura telh tur hian dilna 15,686 a lut tawh a, heng zingah hian public leh private hospital 8,735 thlan a ni tawh.